'Ez gara jaitsiko' ikuskizuna Donostian izango da asteburuan

'Ez gara jaitsiko' ikuskizuna taularatuko dute asteburu honetan Katxiporretako pailazoek Donostiako Victoria Eugenia Antzokian. Ikuskizuna Katxiporreta-ren eta Alboan Gobernuz Kanpoko Erakundearen arteko lankidetzaren parte da, izan ere, erakundeko 'Amazonia gara' kanpainaren barruan kokatzen da. Helburua, Euskal Herriko herritarrak mobilizatzea du, Amazonia eta bertan bizi diren herriak babesteko eta klima-aldaketaren aurka borrokatzeko.

Katxiporreta konpainiatik jakitera eman dutenez, oraingoan Pirritx ez da oholtza gainean izango, izan ere «pneumonia izan du eta jada osatuta badago ere… poliki eta patxadaz ari da indarberritzen», adierazi dute. Hortaz, ikuskizunean Porrotx, Marimotots eta beste taldekideak izango dira ikusleekin irri, kanta eta dantzan.

Guztira hiru emanaldi eskainiko dituzte asteburuan Donostian, Ekainaren 15ean, larunbatean, bi (16:30ean eta 19:00etan) eta ekainaren 16an, igandean, bakarra, goizeko 11:00etan.

Duela urtebete baino gehiago hasi zen abentura honetan, ikusleek Yumi ezagutuko dute, Amazoniako oihanean bizi den neskatila indigena, eta hango bizitza eta mehatxuak kontatuko dizkie. «Bidaia honetan, Euskal Herritik Amazoniara zuhaitzez zuhaitz jauzi eginez, munduko hainbat leku ezagutuko ditugu» diote Katxiporretako pailazoek. 'Ez gara jaitsiko' ikuskizunak 70 minutuko iraupena izango du.

Proiektu honen harira Leire Bilbaok idatzi du 'Ez gara jaitsiko' ipuin animatua, Irrimarrak ilustratu du, eta Xabier Zabala konpositoreak musika jarri dio.

Temas

• Euskera
• Antzerkia