Kuiak eta hurrak iritsi dira, udazkena gertu dagoen seinale

Abuztuko azken feria zen oraindik atzokoa, baina uda agurtzeko gutxi falta dela agerian geratu zen, kuiak, hurrak eta txikoria bezalako produktuekin. Udazkena gerturatzen ari dela ezin da ukatu horiek ikusita.

Urteko lehen kuiak Zeraindik iritsi dira aurten, Iñaki Intxaustiren Mendarte baserritik. Gernika motakoak dira, ekologikoak, eta zatika daude salgai, kiloa 2,8 euroan. Izan ere, kuia horiek handiak dira, eta hori erakusteko, eskuetan jaso zuen bat zeraindarrak, bost-bat kilokoa.

Hurrak, berriz, Aramatik iritsi dira, eta Jaione Irazustaren postuan zeuden salgai, kiloa 5 euroan. Iaz baino gutxiago daudela zioen aramarrak, baina ale handiagoak direla ere bai. Kilo erdiko poltsetan zituen prestatuta, eta azkar asko saldu zituen, erosleak zain zeudelako nonbait. Hurrekin batera, Irazustak txikoria ere aurkeztu zuen, bakoitza 1,3 euroan.

Lekak ere aipatu behar dira, atzo egundoko aukera zegoelako Plaza Nagusian, bost mota ezberdin hain zuzen. Itsasoko Maria Jesus Oriak zituen gehienak: igitai motakoa, gorria zapala eta borobil morea eta berdea. Beste postuetan berde zapala ere bazegoen aukeran. Lekaren kiloa 6 eta 7 euro artean dago. Esan behar da aukera zabala zela, baina kantitatea nahiko gutxi. Aurten beste urteetan baino gutxiago dago.

Aire libreko tomatea ere ez dago ia. Plazan saltzen duten baserritar askok utzi egin diote tomatea jartzeari, ez delako asko jasotzen, eta aurten gutxiago oraindik, orain arte egin duen uda aldrebesaren ondorioz. Orain, gainera, herdoila hartzeko arriskuan omen dago tomatea, gauak eta goizaldeak hotzak direlako, eta goizetan ihintza sortzen delako.

Sagarrak, aldiz, ugari izango omen dira. Hala iragarri zuen duela aste batzuk Jose Antonio Elosegi gabiriarrak, eta momentuz ez da faltarik. Atzo mota berri bat aurkeztu zuten, gainera, Aragoiko marroixka izenekoa. Oriak eta Arantxa Lopetegik zuten salgai, kiloa 3 euroan. Datorren astean Errezilgo Simon Aizpuruk hasiko du salmenta denboraldia.

Orain, porrua aldatzeko garaia ere bada, eta ilaratxoak sortu ziren atzo hori erosteko. Ehuneko sortak 4-4,50 euro artean ziren.

Perretxikoen atalean, Lasak eta Barcinak 45 kilo ziza hori (10-20 euro kiloa) eta 40 kilo onddo (22-33 euro) eskaini zituzten.

Temas

• Zabalik