Emakundek 800.000 euro bideratuko ditu enpresetan eta elkarteetan berdintasuna sustatzeko

Enpresetan eta elkarteetan emakumeen eta gizonen arteko berdintasuna sustatzeko ematen dituen bi dirulaguntza argitaratu ditu Emakunde Emakumearen Euskal Erakundeak. Orotara 800.000 euro banatuko dira esparru guztietan parte hartzea sustatzeko dirulaguntzak irabazi asmorik gabeko emakumeen elkarte eta federazioei eta emakumeen fundazioei zuzenduta, betiere haien helburu eta jarduera eremu bakarra emakumeen eta gizonen benetako berdintasuna lortzen laguntzea bada.

Lehen atal honetan, zehazki, 400.000 euro zuzendu ditu Emakundek eta elkarteek proiektuak egiteko proposamenak aurkeztu ahal izango dituzte datorren urtean, otsailaren 2ra arte. Dirulaguntza eskatzeko orria Emakunderen webgunean dago.

Horrez gain, enpresetan berdintasun planak bultzatzeko dirulaguntzak ere argitaratu dira. Enpresa, erakunde pribatu, kooperatiba eta irabazi asmorik gabeko erakundeei zuzenduta daude, aholkularitza enpresa homologatu bat kontrata dezaten emakumeen eta gizonen berdintasunari buruzko diagnostikoa eta berdintasunerako plana egiteko.

Zehazki, 10 eta 150 langile artean dituzten erakunde eta enpresa pribatuak dira laguntza jaso ahalko dutenak, baldin eta, lehen urratsetan, baliabide materialak, ekonomikoak eta pertsonalak behar badituzte, enpresan berdintasuna sustatuko duen kultura barneratzea errazteko.

Gainera, deialdia zabalik dago irabazi asmorik gabeko erakundeentzat, baldin eta gutxienez hamar pertsonak lan egiten badute eta beren berdintasun planak indarrean dagoen legeriara egokitu behar badituzte. Eskabideak aurkezteko epea 2024ko otsailaren 16an amaituko da.

• Temas
• Emakunde