Erosotasunean eroso

Berrogeitaka urtetako gizon horiekin egin zuen bat Sanchezek eta arrazoi du: nola ez ulertu guztiok ezagutzen ditugun gizon gaixo horien deserosotasuna, gure ingururik hurbilenean badaude. Urrutiago ere joan zitekeen Pedro Sanchez. Ezagutzen ditugu, halaber, adin horietako emakume asko deseroso sentitzen direnak feminismoarekin edo, behintzat, feminista batzuen hainbat adierazpen eta ekintzekin. Gaixoak hauek ere, deserosotasunaren hatzaparretan erori direlako, jakinda ere epe laburrean eroso sentituko direla deserosotasunak eragindako aldaketekin.

Nire ustez, ordea, erosotasunari balio handiegia ematen zaio, hor kokatzen da askotan adierazpen baten edo ekintza baten onargarritasunaren muga. Eroso zaude, galdetzen zaio politikariari edo beste edonori. Eta beti espero dut norbaitek esango duela ez dagoela hor, ez dela horretan ari erosotasunaren bila, erosoago sentituko litzatekeelako etxean gozo, hondartzan edo mendi baten gailurrean, baina ez diela ekintza horiei erosotasun bila ekin. Ez diot, halere, horrelakorik inori entzun. Esango dute baietz, eroso daudela, deserosotasuna aitortzea beraien kalterako litzatekeelakoan.

Edozeren gainetik erosotasuna lehenesten duenak ez du ezer aldatuko, dugun horretan eroso sentitzen denak ez du aldaketarik nahi izaten. Erosokerian ere erortzen da sarritan. Nola heldu dira gure agintariak gizon eta emakumeon arteko eskubide berdintasuna aldarrikatzen duen pankartaren atzealdera? Nola heldu dira bortxakeria matxistaren aurkako adierazpenak egitera? Nola onartu behar izan du gizon askok alabaren-tzat, emaztearen kasuan onartezina iruditzen zitzaion hori? Dudarik gabe, deserosotasunaren bitartez. Zeuden horretan deseroso sentitu zirelako, feminismoak deseroso sentiarazi zituelako.

Eta bai, gehienetan zapalduak hobeto sumatzen du deserosotasun hori zapaltzaileen parte denak baino. Bigarren mailako herritar gisa hartuak ziren emakume horien deserosotasunak sortu zuen deserosotasuna agintean zeuden gizonengan eta horrek eragin zituen aldaketak.

Zorionak Sanchezek defenditu nahi izan dituen gizon horiei, aurrerapenen atarian daudelako.