Berdintasuna, urrun
Oraindik ere, emakumeok, esparru publikoan 'bestea' gara
Gaur, uztailak 24 dituen honetan, gai bakarrak kolonizatzen ditu elkarrizketa guztiak: hauteskundeen emaitzak. Ohiturari jarraituz eta zorionez, lerrook joan den astean idatziak dira eta horrek ... atzo gertatu zenari eta ez zenari buruz hitzik ez egiteko aitzakia eskaintzen dit. Urte erdia baino gehiago gelditzen zaigu hurrengo hauteskundetarako.
Ia denetik eskaini digu kanpainak, baina nik ikuspuntu bat aukeratu dut. Ez zaizue harrigarria irudituko: emakumeok, hautagai direnak nahiz botoaren jabe garenok, esparru publikoan jasotzen ditugun manerak, nola ikusten gaituzten, ze portaera duten gizonek emakumeekiko. Ez dotrinari dagokionez, ekintzek adierazten dutenari baizik.
Distantzia handia dago, oraindik, dotrinaren eta ekintzen artean. Edonork esango dizu gizon eta emakumeon arteko eskubide berdintasunaren alde dagoela, gizon guztiek arbuiatuko dute matxismoa. Beste kontu bat da ze zirrikitutik egiten dizun ihes oraindik ere barruan duzun gizonkeriak. Mikro eta makro.
Adibide bat: gizonen kasuan abizena lehenesten da, Urkullu, Sánchez, Feijóo, Esteban. Emakumeontzat, ordea, izena aukeratzen da, Yolanda, Maddalen, Diana. Bizitza pertsonalean, inguru hurbilean gehienetan izena erabiltzen da, gizonentzat nahiz emakumeontzat. Esparru publikora salto egiterakoan nabarmentzen da aldaketa. Hor gizonezkoek abizena dute, guk, izena, etxean bezala.
Beste bat: norbait aurkezten dizutenean, norbait ezagutzen duzunean, gizonen artean arruntena eskua ematea da. Emakumeoi, berriz bi musu ematen zaigu. Ez dut gogoan hainbeste musu iraganean, baina gaur musuak dira legea emakumeontzat, ez gizonentzat eta ataka horretan gizon bati eskua ematen dion emakumeari eskua hartuko diote, bai, baina propina gisa bi musu jasoko ditu, nahi eta ez. Berdin zaio adina edo estatusa, musuak emakumeontzat, eskua gizonentzat.
Sustrai luze eta sendoak ditu matxismoak, hainbat landarek bezala, kendu dezakezu begi bistan dagoena, baina berehala sortuko da berriz ere landarea, temati. Zer esanik ez landarea bere horretan uzten baduzu. Oraindik ere emakumeok, esparru publikoan, 'bestea' gara, lekuz kanpo dagoen norbait, ez dagokigun lekuan dagoen norbait. Bitxikeria.
Ez naiz esaten ari gauzak aldatu ez direnik, hobera egin ez dutenik. Nabarmendu nahi dudana da oraindik ere distantzia handia dagoela hitzen eta ekintzen artean. Ekintzen kaltetan, are gizon eskolatu, aurrerakoi eta jantzien artean.
¿Tienes una suscripción? Inicia sesión
