Aurtengo oporrak

Eta horrela izan daiteke, aurtengoan posta bidezko botoak inoiz ez bezala ugaldu direlako. Horrek adierazten du kanpaina hasi baino lehen ere askok erabakia zuela nori emango zion botoa, erabakiaz damutzeko beldurrik gabe. Eta, bestalde, aurtengo uztailaren bukaera aldera etxetik kanpo, herritik kanpo egongo dela jende andana.

Eskolak eta gainerako hezkuntza sistemaren lekuetako langileak bai, horiek oporretan daude, urtero bezala. Horrela dabiltza asteotan familia asko, seme-alaben oporrak eta gurasoenak uztartu ezinik. Oporretan dago administrazioaren hainbat atal ere bai, itxita ez, baina ordutegi murriztuarekin, oporretan hedabideetako langile ugari.

Eta lan bikoitza eginez beste asko, adibidez, udatiarrak jasotzen dituzten herrietako osasun langileak edo tabernetako zerbitzariak. Horiek guztiak eta beste asko arautik kanpo daude, gogoz kontra seguruenik, baina arautik kanpo. Nonbait, salbuespenak salbuespen, gehiengoa oporretan dago, benetako oporretan, etxetik kanpo.

Sare sozialak lekuko. Hor daude araua betetzen duten guztiak, gehienetan itsasotik hurbil, benetan ala itxuraz. Duela gutxi irakurri nuen Balearetako enpresa batek orduka alokatzen dituztela itsasontziak, «influencer» esaten zaien horiek argazkiak atera ditzaten, bainu jantzi desberdinak, postura desberdinak, itsasontzi bera, guztia ordubetean edo pare bat ordutan.

Hamarraldi gutxitan, salbuespen zena arrunta bilakatu da, are gehiago, ezinbestekoa. Horretara bultzatzen zaitu gizarte osoak. Gero, udaren bukaeran esango digute zeintzuk ez duten, etxetik kanpo egonda ere, oporrik egiten. Seguru asteotan gora egiten dutela emakumeon kontrako erasoek, kalean, festetan nahiz etxean. Indarkeria matxistarik ez dagoela pentsatzen duten emakumeak ere arrisku horren pean daude, begi bistakoa dena ukatzeak ez ditu libratuko.

Eta bai, jakin badakit hau aipatzea ez dela dotorea uda giroan, ezta neguan ere, baina bereziki udan. Suposatzen da, behin azken hauteskunde hauek pasa ondoren, udak ji-ji-ja-jarako direla, arinkerietako, ihesaldi hori behar dugula datorren ikasturteari ekiteko. Erasogileak, ordea, ez daude oporretan.