Errenteria

Dantzari Txiki Egunean, maiatzaren 1ean, 350 dantzari inguru bilduko dira

Dantzari Txiki Eguna maiatzaren 1ean ospatuko da Ereintza Dantza Taldeak antolatua, eta Herri Arte Eskola eta Errenteriako Udalaren laguntzaz. Egun honek Euskal Herriko herri ezberdinetatik etorritako 8 talde bilduko ditu, guztira 350 dantzari inguru espero dira: Murixka (Lezo), Orbeldi (Usurbil), Zumaiako Dantza Eskola (Zumaia), Haurtzaro (Oiartzun), Hondarribiako Dantza Eskola (Hondarribia), Udaberri (Tolosa) eta Pasaia Musikal (Trintxerpe).

Dantzari guztiak Koldo Mitxelena plazan bilduko dira eta hamaiketako eder bat jan ondoren herriko kaleetan zehar ibiliko dira, goizeko 11:30etik aurrera. Desfileak hiru ibilbide ezberdin izango ditu, eta erdiguneko kale guztiak barneratuko dira festa giroan. 13:15ean Gamon Zumardian elkartuko dira talde guztiak azken dantza saioa egiteko.

Arratsaldeko saioari, berriz, trikitilarien doinuarekin ekingo zaio 16:15ean, eta jarraian 16:30ean Modesto musika joleak gaztetxo guztiak datzan jarriko ditu.

Eguraldi txarra eginez gero, Koldo Mitxelena ikastetxeko eta Koldo Mitxelena-Esmalteriako aterpetan egingo da goizeko saioa. Arratsaldeko saioa, berriz, Gaztaino auzoko frontoi-aterpe berrian egingo litzateke.

Bazkariak urtero bezala herriko elkarte ezberdinek emango dituzte eta Ereintza Dantza Taldeak eskerrak eman nahi dizkie euren laguntzagatik: Hibaika, Txepetxa, Amulleta, Gure Toki, Gau Txori, Niessen, Txintxarri, Alkartasuna eta Landare. Baita ere beren laguntza eskaintzen duten komertzioei: Super Amara eta Sein Izarra. Azkenik, Ereintza Dantza Taldeak Herri Arte Eskolako ikasleen gurasoei emandako laguntza eskertu nahi die.