Balkoitik balkoira bertsotan 'Hitzetik hortzera'n

Haritz Mujikarekin Asteasuko udaletxeko balkoira igoko da saioa. Gainera, Pello Errota bertsolariaren heriotzaren ehungarren urteurrenari buruz gehiago jakin nahi izango du

Bertsolariak sarri ikusten ditugu oholtzara igota kantari. Igande honetako 'Hitzetik Hortzera' saioa, ordea, gorago igoko da, balkoira, eta bertan zer gertatzen den ezagutu nahiko du. Zer sentitzen du bertsolariak han goian?

Uda giroko epeltasunean, udazkeneko euri tanten azpian edota neguko hotzean, urte sasoi guztietan antolatzen dira balkoitik balkoirako bertso saioak. Sarritan librean izaten dira eta horregatik ohikoa da bertsolariek aurrean ikusten dutenari abestea: testuinguruari, plazari, jendeari, atrezzoari... gaurkotasuna duten gaiei ere tartea egin ohi diete, noski.

Xenpelar Dokumentazio Zentroko artxiboen artean, argazki deigarri bat aurkitu du saioak: bertan ageri dira Pello Errota eta Joxe Bernardo Otaño bertsolariak Asteasuko udaletxeko balkoian. Hari horri tiraka, Haritz Mujikarekin elkartuko da Eider Perez balkoi horretan bertan. Pello Errota asteasuarra hil zela ehun urte beteko dira eta urteurren seinalatu hori ospatzeko zer antolatu duten galdetuko dio.

Algortan ohitura da uda sasoian balkoitik balkoirako bertso saioa egitea. Ekainaren 22an izan zen saioa Algortako portu zaharreko Etxetxu plazan, eta Amets Arzallus eta Maialen Lujanbio aritu ziren bertsotan. Saran, aldiz, herriko bestetan izan zen bertso saioa irailaren 12an; han Aitor Servier, Amets Arzallus eta Maindi Murua bertsolariek abestu zuten. Eta, urriaren 7an Oñatin izan ziren bertsotan Agin Laburu eta Iker Zubeldia.

Igandean, 15:00etan, ETB1en izango da ikusgai 'Hitzetik Hortzera'.

Temas

Euskera

Contenido Patrocinado

Fotos

Vídeos