Euskal kultura aztergai Udako Ikastaroetan

Euskal kultura aztergai Udako Ikastaroetan
Mintzola.eus

Euskal kulturaren kontsumoari eta transmisioari heldu zioten 'Euskal kulturari so. Bertsolaritzaren artikulazioak' ikastaroaren lehen jardunaldian

El Diario Vasco
EL DIARIO VASCO

Euskal kulturaren zaletasuna sustatzeko zenbait gako mahaigaineratu ziren Miramar Jauregian abuztuaren 22an. 'Euskal kulturari so. Bertsolaritzaren artikulazioak' izenburuko bi eguneko eskola antolatu zuen Mintzola Ahozko Lantegiak UPV/EHUko Uda Ikastaroen baitan. Lehen egunean euskal kulturgintzaren argazki orokorraren gainekoak eskaini dituzte Josu Amezagak eta Iratxe Retolazak, kontsumoari eta transmisioari lotuta, eta, ondoren, kultur sorkuntzaren prozesuari buruzko zenbait ekarpen ekarrita, bertsozaletasunaren argazkia eskaini zuen Harkaitz Zubirik.

Josu Amezagak euskal kulturaren kontsumoan jarri zuen begia. Ahalik eta jende gehiagorengana heltzeko euskal kulturaren plan baten beharra azpimarratu zuen: «erakundeek errepideak jartzen dituzte, motorea gizarteko norbanakoek dute; baina ezin da jendearen gainean ardura guztia jarri. Eskaerari erantzun ez ezik, eskaintza handitu ere egin behar da, eta, alde horretatik erakundeek jarrera proaktiboagoa beharko lukete. Ez da bakarrik errepideak jartzera mugatu behar».

Iratxe Retolaza ere bat etorri zen ideia horrekin, euskal kultur sorkuntzaren transmisioaren inguruan aritu denean: «Bezeroak ez du nahi hori horren aitzakian, ez da kontuan hartzen hartzaileak ere eraiki egiten direla. Kultur agenda osatzea da politika hedatuena egun, eta programazio horiek osatzeko koordinazioa eta gizarteratze ekimenak falta dira». Bestalde, besteak beste, kultur sortzaileen arteko esperientzia kolektiboak eta diziplinartekotasuna ere bultzatu behar direla azaldu zuen Retolazak 'Kultur sorkuntzaren transmisioa: ajeak eta erronkak' hitzaldian, «kultur eragileen arteko sinergiak sortu eta kultur komunitatea trinkotzeko».

Harkaitz Zubirik kultur sorkuntza arrakastatsua izateko gakoetako zenbait aipatu zituen eta bertsolaritzan jarri zuen ikusgai: «kultur sorkuntza funtsean da existitzen diren osagaiak hartu, jabetu, birkonbinatu, zerbait ekoitzi eta ekoizpen horrekin jendea liluratzen saiatzea eta horretan norbanakoak garrantzia handia dauka. Interakzio-negoziazio bat dago bertsotan ekoizlearen eta hartzailearen artean, eta horrek ekoizpena bera aberasten du. Espazio anitz eta berdinzalea garatu da hori gertatzeko».

Bertsolaritzaren artikulazioak

Mahai-inguruan solasean aritu ziren gero lehen egunean parte hartu zuten hizlariak. «Bertsolaritzarena ez da kasualitatea. Lan egin da: sustapenean, hezkuntzan, ikertegian, dokumentazioan... beste sektore batzuetan ere ez litzateke ikuspegi horrekin lan egin beharko? Plan baten beharrarena hortik diot, eta gutako bakoitzak zein ekarpen egin dezakeen gogoetatuta», aipatu zuen Amezagak. Horretarako, «oso garai onean» gaudela aipatu zuen Zubirik «datuak biltzeko eta nahi dugun horretara bideratuta lan egiteko», eta Retolazak gehitu zuen informazioaz gain, giza baliabideak ere badaudela, nahiz eta horiek saretzea falta den, eta hori ere beharrezkoa izan, «bestela, esperientzia metatu asko galduko da». Euskal kultura kontsumitzeko komunitatea trinkotzea bai, baina komunitate hori zabaltzearen garrantzia ere azpimarratu da, izan ere, «euskaldun batzuek gero eta gehiago kontsumitzen dute euskaraz, baina kontsumitzaile kopuru hori ez da igo».