Usurbil

Pettiren 'XX eta bortz' kontzertua izango da hilak 23an Sutegiko Auditoriumean

Pettiren 'XX eta Bortz' zuzeneko kontzertua izango da hilak 23an, igandea, arratsaldeko 18:30ean, Sutegiko Auditoriumean. 25 urte bete dira Petti musikari eta abeslari nafarrak bere lehen diskoa argitaratu zuela: 'Amets bat'.

Hamaika kantu «indartsu, adierazkor, gordin eta hunkigarri» biltzen zituen disko hura ibilbide luze eta emankor baten hazia izan zen: 13 disko bere izenean, hainbat eta hainbat kolaborazio, zuzenekoak formatu guztietan, hibridazioak... Horren adibide da 'Frankenstein agurgarria' izeneko disko-liburua. Musikaren zirrara eta ahots baten dardara zure gorputz barrenera, zuzen-zuzenean.

Orain, ibilbideko kantu rokero eta elektrikoenak bildu, eta zuzeneko disko bat grabatzen ari da: 'XX ta BORTZ'. Grabaketako kontzertuetan ohiko bandaren laguntzarekin ari da, alegia, Etxeko Uzta: Joseba Irazoki (gitarra), Iñigo Telletxea (baxua) eta Igor Telletxea (bateria). Musikari horiek gutxi ez, eta Ruben Caballero gitarrista gehitu zaie. Haiekin guztiekin emango du kontzertua Sutegin.

Ikuskizuna ikusteko sarreraren prezioa 8 eurokoa da. Aretoaren edukiera kontuan hartuta, aldez aurretik eman behar da izena, otsailaren 23a baino lehen, helbide honetan: https://usurbilkultura.eus/eu/ikuskizunak/petti-xx-ta-bortz-zuzenean-kontzertua.