Getaria

Igandean Dantzari Txiki Eguna ospatuko du Gure Txeru Elkarteak

Udaberriaren etorrerarekin, Gure Txeru Elkarteak dantza festa antolatzen du urtero. Igande honetan, apirilak 6, Dantzari Txiki Eguna ospatuko dute Getarian.

Betiko legez, beste herrietako dantzari taldeak gonbidatzen dituzte eta aurten, sei dantza talde elkartuko dira goizean herriko kaleak dantzaz betetzeko.

Oiartzun, Lezo, Pasai Donibane, Lesaka, Zarautz eta Getaria herrietako dantza-taldeak, 11:15ean kalejirari ekingo diote elkarrekin Sahatsaga goitik hasita herriko kaleetan zehar. Takde bakoitzak ibilbide ezberdinak egingo dituzte eta noizbahinka geldialdiak eginaz, euren dantzak eskainiko dituzte.

13:00etan, Frontoian, emanaldi bateratua egingo dute, eta eguerdiko 14:00etan bazkari herrikoia izango dute denak. Arratsaldeko 16:00etan, erromeria abian jarriko dute, Elizagoien Ahizpekin, eta gaztetxoak danatzan aritzeko aukera izango dute, amaitzean dantza talde bakoitza bere herrira itzuli arte. Eguraldiak laguntzen badu, festa giroa izango da.