Azkoitia

Lau t'erdiko txapelketako partidua ostiralean, Ezkurdia eta Larrazabalekin

Lau t'erdiko Eusko Label Txapelketaren final laurdenetako kanporaketa jokatuko dute ostiral honetan, urriaren 10an, Ezkurdiak eta Larrazabalek Gurea pilotalekuan. Hiru partida jokatuko dira bertan 21:15etik aurrera, eta sarrerak dagoeneko eskuragarri daude aurrez www. entradasfronton.com atarian, baita leihatilan ere partida egunean.

Joseba Ezkurdiak eta Iker Larrazabalek jokatuko dute A Serieko final laurdenetako ligaxkako partida. Txapelketako beteranoena (34 urte) eta gazteena (23) aurrez aurre. Buruz burukoan ere elkarren aurka aritu ziren Gurean eta orduan Iker nagusitu zen 21-22ko emaitzarekin.

Ezkurdiak final-zortzirenetan Zallako pilotalekuan Elordi 22-17 garaituta lortu du final-laurdenetako ligaxkarako txartela. Hala, hamaikagarrenez izango da fase honetan arbizuarra. Iker Larrazabal, berriz, 22-15 gailendu zitzaion Iraitz Zubizarretari Eibarko Astelehena pilotalekuan eta lehenengo aldiz izango da amurrioarra ligaxkan.

B serieko partidan, Julen Egiguren, Egiguren V., eta Beñat Senar izango dira lehian ostiralean Gurea pilotalekuan.

Horrez gain, txapelketatik kanpo, eskuz binakako partida ere jokatuko da. Artola-Iztueta eta Elordi-Rezusta bikoteak elkarren aurka neurtu beharko dituzte indarrak.