Mendaro

Santa eskearen sustatzaileak omendu zituzten larunbatean

Ohitura zaharrari eutsiz, 50 bat mendaroar elkartu ziren larunbat goizean Enparantza Nagusian santa eskean aritzeko (ezkerreko argazkian). Urtero legez, bildutakoak hiru taldetan banatu ziren eta herriko hiru auzoetan zehar aritu ziren koplatan eta eskean. Goizekoa eginda Aizpe elkartean elkartu ziren berriro bazkaltzeko eta bazkalostean Mendaroko santa eskearen sustatzaile nagusiak izan diren Jose Antonio Loiola eta Florentino Larrañaga omendu zituzten (eskuinean). Antolatzaileek jakinarazi dutenez, aurtengo santa eskean batutako dirua (2.677 euro) Arno guraso elkartearentzat izango da.