Motorrak bilduko ditu abenduaren 11n Herriko plazan antolatuko den erakusketak

Irailean egindako automobil erakusketaren ondoren, motorrei helduko zaie txanda abenduaren 11n, Domeka horretan, Irain elkarteak antolatuta, motozikletak bilduko dira Herriko plazan. Goizeko hamaika eta erdietan hasi eta arratsaldeko ordu bata eta erdiak arte iraungo du ekitaldiak, bi ordu.

Motorrak dituzten antzuolar guztiei euren bi erruberako ibilgailuak Herriko plazara eroateko gonbita luzatu diete erakusketaren arduradunek. Hainbat marka eta eratakoak ikusi ahal izango dira.

Gipuzkoako pilota txapelketako bi final jokatuko dira frontoian goizeko hamaika eta erdietan hasita. Lehen mailakoan, Soraluze klubetik ari diren Aitor Mendizabal eta Manex Balerdi antzuolarrek Paul Ojuel eta Markel Lizeaga hernaniarrak izango dituzte aurkari. Bi bikoteok hurrengo urtean Ohorezko mailan aritzeko txartela eskuratu dute euren klubentzat.

Aurretik bigarren mailako finala izango da Galdos-Sukia (Zegamako Tartaloetxe) eta Otxoa-Garmendia (Lazkaoko Lapke) bikoteen artean.

Debagoieneko janari ekoizleak gertuagotik ezagutzeko antolatu diren bisiten artean, datorren asteko zapatu eta domekan Antzuolako Amatxo gaztandegia ezagu-tzeko aukera eskaini da. Hamaiketan hasiko dira. Txanda infoturismo@debagoiena.eus helbidera idatziz ala 943 796463 telefono zenbakira deituz hartu behar da.

Temas

• Antzuola