Manuel Lekuona Sarirako hautagaitzak aurkezteko epea, zabalik
Irailaren 21era arte aurkeztu daitezke euskal kulturarekiko ekarpen eta konpromiso adierazgarria duten pertsonen proposamenak
DV
Donostia
Larunbata, 19 uztaila 2025, 17:59
Eusko Ikaskuntzak 2025eko Manuel Lekuona Sarirako hautagaitzak aurkezteko epea ireki du irailaren 21era arte. Euskal komunitate globalari ekarpen garrantzitsua egiten dioten pertsonalitateen obra osoari aitorpena egiten dio sariak.
Eusko Ikaskuntzak jakiarazi duenez, behin hautagaitzak onartuta, urriaren 13tik 19ra bozketa jarriko du abian bere web orriaren bidez. Azken boto kontaketa hurrengo proportzio hauetan egingo da: %30 Eusko Ikaskuntzako kideen botoekin, %10 euskal komunitate globaleko kideenekin eta %60 epaimahai instituzionaleko botoekin. Erabakia urrian jakinaraziko da.
Sariaren oinarrien arabera, proposatzen diren pertsonak nabarmenak izan behar dira beren bizi ibilbidean, ez ezinbestean unibertsitate alorrarekin lotuta. Halaber, euskal kulturarekiko ekarpen eta konpromiso adierazgarria izan beharko dute, baita balore unibertsala ere. Hautagaiaren lanaren dibulgazioa ere kontuan izango da.
Era berean, emakume eta gizonen arteko berdintasuna bultzatze aldera, emakumezkoen hautagaitzak sustatuko dira. Gainera, Euskal Herriko lurralde errealitate ezberdinak islatzen dituzten pertsonak lehenetsiko dira.
Eusko Ikaskuntzaren Manuel Lekuona Saria 1983an sortu zen eta ordutik jaso duten pertsonen zerrenda luzea da, besteak beste, Jorge Oteizak, Eugene Goyhenechek, Micaela Portillak, Menchu Galek, Xabier Amurizak, Mari-Jose Azurmendik edota Manuel Lekuona berak. 2024an Juan Mari Beltranek jaso zuen, musika-ondarea berreskuratzen, zaintzen eta transmititzen egiten duen lanagatik.
Saria Remigio Mendiburuk sortutako brontzezko eskultura bat da.
