Lehen sektorearen aldeko apostua egiten duten gazteak

Daniela Gurau gaztea aguakatea hazteko proiektu batean lan egiten ari da; Mattinek Balerdipeko Erleak jarri zuen abian, erlezaintzako proiektua, eta, aurrerago, Inaxio gehitu zitzaion, lanbidez sukaldaria. Hiru gazteek GazteNek programan parte hartzen dute, lehen sektoreak dituen aukerak sustatu nahi dituen ekimena.

Besteak beste, belaunaldi errelebo falta da lehen sektoreak aurre egin beharreko erronka nagusietako bat, eta zailtasun horri erantzuteko asmoz sortu zen GazteNek programa, aurten 21. edizioa beteko duena, Eusko Jaurlaritzaren eta hiru Foru Aldundien eskutik. 2005etik gaur arte, 362 gipuzkoar baino gehiago prestatu dira ekimen horren barruan, beren familia-ustiapenaren kudeaketa beren gain hartuz edo nekazaritza eta abeltzaintzako proiektua abian jarriz.

Gipuzkoako Foru Aldundiak 842.907 euro bideratu ditu aurten ekimen horretara, bost urtez gazteei laguntza tekniko profesionala emateko. Denbora horretan, prestatzaile batekin lan egingo dute beren enpresa-proiektua garatzeko eta ezartzeko. Orainarte Gipuzkoan programa horren esparruan hasitako proiektuen % 90ek bizirik jarraitzen dute. «Bidean sor daitezkeen arazoak konpontzen laguntzeko gaude», dio Imanol Arrieta Abelurreko formatzaileak.

Programaren edizio honetan parte hartzen duten 19 gazteetatik lau lehen aldiz sartzen dira sektorean, eta gainerako hamabostak prestatzen ari dira beren familia-proiektuaren lekukoa hartzeko. 21 eta 38 urte bitarteko gazteak dira, lurraldeko hainbat tokitatik etorriak: Aizarnazabal, Antzuola, Azpeitia, Beasain, Getaria, Hernani, Hondarribia, Ikaztegieta, Itsasondo, Zaldibia, Zestoa eta Zumaia.

Aurkeztutako proiektuei dagokienez, haragitarako behiak haztera bideratutakoak nabarmentzen dira bereziki, eta horiei esnetarako behien abeltzaintzarekin, ardien hazkuntzarekin, erlezaintzarekin, txanpiñoien laborantzarekin, mahastizaintzarekin, frutagintzarekin eta erruteko hegaztiekin lotutakoak gehitzen zaizkie.

• Temas
• Diputación Foral de Gipuzkoa