17 euskal konpainiek aurkeztuko dituzte beren proiektuak Gasteizko Nazioarteko Jaialdian

Bere 50. urteurrena ospatzeko 50 emanaldi baino gehiago eskainiko ditu Gasteizko Nazioarteko Antzerki Jaialdiak. Aurkezpenean azaldu dutenez, 41 ikuskizunen 51 emanaldi programatu dira, horien artean tokiko konpainien erabateko 12 estreinaldi, Euskadin lehen aldiz ikusiko diren 14 proposamen, Gasteizko Udal Antzokien Sarearekin egindako baterako bi produkzio eta Off Lokal deialdiko zortzi lan.

Jatorriari dagokionez, 17 euskal konpainiak beren proiektuak aurkeztuko dituzte, eta haietako bederatzi euskarazko proposamenak izango dira. Nazioarteko konpainiak ere izango dira, besteak beste, jaialdian jada parte hartu duten NeedCompany, Wajdi Mouawad eta Family Flöz, eta lehen aldiz izango diren Sergio Blanco antzerkigile uruguaitarra, Peeping Tom Belgikako konpainia eta Romina Paula argentinarra.

Gasteizko antzokietara igoko dira, besteak beste, Anabel Alonso, Ernesto Alterio, Vicky Peña, Nathalie Poza, Javi Gutierrez, Luis Bermejo, Pepe Viyuela edo Ana Rujas moduko antzezleak.

Era berean, Mario Gas, Andrea Jimenez, Sergio Peris-Mencheta, David Serrano eta Cris Blanco moduko zuzendarien lanak izango dira, eta, testuei dagokienez, Harold Pinter, Tenesse Williams eta Juan Mayorga egileenak taularatuko dira, besteak beste.

Dantzak ere izango du tokia jaialdiaren 50. urteurrenean, eta Gasteizen izango dira, besteak beste, Roger Bernat, Nacho Duato, Proyecto Larrua eta Enrique Cabrera eta Omar Meza.

'Antzerkia zabaltzen' ataleko hamar bat jarduera ere izango dira, horietako batzuk ohikoak: 'Atalak', 'Haurtxoak' proiektua, funtzio irisgarriak edota publikoarekin egindako topaketak.

Atal honetan berrikuntza bat ere izango da: 'Irakurtzeko antzerkia'. Irakurketa klub baten antzeko formatua duen proposamena da eta Juan Ibarrondok dinamizatuko du. Tennessee Williamsen 'A Streetcar named Desire' klasikoaren testua landuko da eta azaroaren 21ean emango zaio amaiera antzezpenarekin.

Jarduera horiei guztiei jaialdiaren 50. urteurrenarekin lotutako beste ekintza batzuk gehituko zaizkie, eta udaren ostean aurkeztuko dira.

Gasteizko Nazioarteko Antzerki Jaialdia irailaren 26tik abenduaren 13ra arte ospatuko da.

Temas

• Antzerkia