Bertsoak adineko egoitzetan bueltan izango dira datorren astean

Gipuzkoako Foru Aldundiak eta Lankuk, lurraldeko adinekoen egoitzekin lankidetzan, 'Bertso Bira' kultur ekimenaren edizio berria antolatu dute. Egitasmoaren helburua da bertsolaritzaren bidez adineko pertsonen bizi-kalitatea hobetzea eta gaitasun kognitiboak sustatzea, euskal kulturaren adierazpenik garrantzitsuenetako bat dela kontuan izanda. Lehen 'Adin-adin' izenarekin ezaguna zen proiektu honek bederatzigarren edizioa beteko du aurten.

Aurreneko saioak astelehenean, urriaren 28an izango dira Tolosako Yurreamendi egoitzan (Anjel Mari Peñagarikano eta Amaia Agirre bertsolariekin) eta Zumaiako Ote zuri egoitzan (Jon Maia eta Libe Goenagarekin). Guztira, 30 saio egingo dira Gipuzkoako 24 udalerritako egoitzetan, bertakoek egoiliarrei bat-bateko bertsoez gozatzeko aukera eskainiz. Saio bakoitzean, eskualde bereko eta belaunaldi ezberdinetako bi bertsolarik hartuko dute parte; 34 bertsolarik, guztira. Ekimenak azken urteotan izan duen arrakastak lagundu du honen hedapenean, eta gero eta egoitza gehiago dira saio hauetan parte hartzen dutenak.

Saio bakoitzaren aurretik, egoitzetako animazio eta dinamizazio-langileek egoitzetako egoiliarrekin egiten dute lan, bertso zaharrei eta abesti herrikoiei dagokienez dituzten lehentasunak ezagutzeko. Horrela, bertsolarien parte-hartze aktiboa sustatzen da, eta horrek parte-hartzaileen eta artisten arteko lotura indartzen du.

Ekimen honen balioa azpimarratu du Maite Peña Zaintza eta Gizarte Politiketako diputatuak, izan ere, «saio hauek entretenimendua eskaintzeaz gain, musikaren eta bertsoen bidez oroitzapenak eta bizipenak aktibatzen laguntzen dute, eta hori oso onuragarria da egoitzetako erabiltzaileen ongizate emozionalerako eta kognitiborako«, azaldu du.

Temas

• Bertsolaritza