Aire zabaleko zinea datorren astean
'El 47', 'Érase una vez mi madre' eta 'El monje y el rifle' pelikulak proiektatuko dira ostegunean, ostiralean eta larunbatean
I. A.
Donostia
Larunbata, 2 abuztua 2025, 17:56
Eskaintza berezia prestatu du Chillida-Lekuk datorren asterako. Zinea eta natura uztartuko ditu Hernaniko museoak eta hiru egunetan, gauean, hiru film proiektatuko dira belardian. Hain zuen, 'El 47', 'Érase una vez mi madre' eta 'El monje y el rifle' pelikulak proiektatuko dira.
Museoko arduradunek azaldu dutenez, ikusleek egun horietan 19.00etatik aurrera museoa ilunabarrean bisitatzeko aukera izango dute eta proiekzioak 22.00etan hasiko dira. Aire zabaleko zine gauez gozatzeko, museoak hamakak jarriko ditu parte-hartzaile guztien eskura, baina filma eroso ikusteko, beroki, manta edo antzekoren bat ekartzea gomendatzen dute. Sarrerak museoko web orrian eskuratu daitezke.
Lehenengo proiekzioa ostegunean izango da, 'El 47' filmarekin. Marcel Barrenak idatzi eta zuzendutako pelikula honek disidentzia baketsuko ekintza baten eta 1978an Bartzelona eraldatu eta bertako auzo pobreen irudia aldatu zuen auzo-mugimenduaren istorioa kontatzen du. Manolo Vital autobus-gidaria 47. lineaz jabetu zen Udalaren gezur bat desegiteko: autobusak ezin zirela Torre Barora igo. Keinu hori aldaketaren katalizatzaile bihurtu zen, Bartzelona modernoa eraikitzen lagundu zuen auzo-harrotasunaren eta langile-borrokaren ikur.
Ostiralean 'Érase una vez mi madre' zintaren txanda izango da. Ken Scottek zuzendariaren lana, Parisen, 1963 urtean girotua. Roland, sei neba-arrebako familia bateko gazteenak, malformazio bat du oin batean. Medikuen arabera, ezingo da inoiz ibili, baina bere ama burugogorrak, Estherrek, ez du onartu nahi. Fede hautsiezinaren eta ezohiko ukazioaren konbinazio baten bidez, emakumeak edozein ezbeharri aurre egitea erabaki du bere semea zoriontsu izan dadin.
Azkenik, larunbatean eskainiko den pelikula 'El monje y el rifle' izango da. 2006. urtean Butango erresuman girotua, hauteskundeak egiteko, gobernuak bozketa-simulazioak antolatzen ditu, herritarrak ezagutzen ez duten zerbaitetarako prestatzeko. Bitartean, Ura hirian lama zahar batek monje bati agintzen dio arma bat lor diezaiola laster izango den erregimen-aldaketari aurre egiteko, baina lortzen duen errifle baliotsua arma bildumagile estatubatuar batek bilatzen duen pieza bat da.
