Agustín Ugarte Sarien IV. ediziorako deialdia, zabalik

Gipuzkoako Foru Aldundiko Kulturako eta Nazioarteko Lankidetzako Departamentuak epea ireki du Agustín Ugarte Sarien laugarren ediziorako hautagaitzak aurkezteko. Sari honek urtero aitortzen du beren bizitza munduko komunitate kalteberenei laguntzen eta lankidetzan aritu diren pertsonen eta erakundeen ibilbidea. Aintzatespena lortzeko dokumentazioa aurkeztu ahal izateko epea zabalik da, bai bakarkako kategorian, bai kolektiboan, uztailaren 15era arte. Epaimahaiaren ebazpena irailean argitaratuko da.

Sari hauek Nazioarteko Lankidetzako Departamentuak bultzatu zituen lehen aldiz 2021ean, Agustín Ugarte kooperatzaile hondarribiarrari omenaldia egiteko. Behar Bidasoaren sortzailea, Agustín Ugarte mugarri bat da lankidetza eraldatzailean 1989tik. Justizia sozialarekiko konpromisoak, sentsibilizazio-prozesuen bultzadak eta giza duintasunean eta pobreziaren egiturazko kausen eraldaketan oinarritutako lankidetzaren defentsak markatu zuten haren bizitza.

Aurreko edizioetan izen handiko figura eta kolektibori aitortu zaie egindako lana lankidetzaren eremuan: hala nola Mari Cruz eta Mila Andueza, Aita Olaran edo María Jesús Ramírez Fernández 'Chucha', bai eta Mugen Gainetik, Medicus Mundi edo Calcuta Ondoan erakundeak ere. Aldundiko iturriek adierazi dutenez, «Agustín Ugarte saria orobat da Gipuzkoako gizartea nazioarteko lankidetzaren balioaz eta elkartasun globalaren zeregin eraldatzaileaz sentsibilizatzeko tresna bat».

Deialdiari eta hautagaitzen aurkezpenari buruzko informazio guztia Gipuzkoako Foru Aldundiaren webgunean dago eskuragarri.

• Temas
• Diputación Foral de Gipuzkoa