Lazkao

II. Ekotopaketak-en aurkezpena gaur arratsaldean Biziolan

'Jauzi Ekosozialak' duela bi urte hasitako ekimenari bultzada eman nahi izan dio aurtengoan, eta horretarako, Euskal Herriko II. Ekotopaketak antolatu dituzte. Jardunaldi hauek ekologismo berria indartzeko eta trantsizio ekosozialerako bidea eraikitzeko helburua dute. Aurtengo edizioa martxoaren 28an eta 29an izango da Arrasaten, 'Trantsizio ekosoziala hobeto bizitzeko' lelopean. Hala ere, ekitaldi nagusiaren aurretik, Jauzi Ekosozialeko kideek aurkezpenak egingo dituzte Euskal Herriko hainbat txokotan.

Goierrin ere egingo dute geldialdia, eta gaur, Biziolan izango dira arratsaldeko 18:30ean. Bertan, Ekotopaketetako egitaraua aurkeztuko dute eta ekimenaren funtzioak eta helburuak azalduko dituzte. Antolatzaileek nabarmendu dute jardunaldi hauek ekologismo berria indartzen jarraitzeko eta aldaketa bultzatzeko apustua direla. Horrez gain, ingurumenarekin lotutako auziei buruz hausnartzeko baliagarriak izango direla azpimarratu dute.