Idiazabal

Kirola, musika eta dantza protagonista festen hasieran Idiazabalen

San Blas jaien lehen asteburua hementxe dugu. Nahiz eta jaietako ekitaldi nagusiak urtarrilaren 31n egingo diren, asteburu honetan herriko giroa piztuko duten hainbat jarduera prestatu dituzte. Herri kirol apustua, herri krosa eta haurren danborrada dira asteburuko ekitaldirik nabarmenenak, beste hainbat musika eta dantza emanaldi ahaztu gabe.

Gaur, 17:00etan, Igarondon izango da herri kirol apustua, non Idiazabalgo Makalak taldeak Legazpiko Lakiola taldearen aurka neurtuko dituen indarrak. Talde bakoitzetik zortzi kidek parte hartuko dute eta bederatzi proba gainditu beharko dituzte: ingudea, harri-jasotzea, txingak, zaku eramatea, trontza, giza-proba, lasto altxatzea, aizkora eta oskol biltzea.

Bihar berriz, Idiazabalgo Herri Krosaren 44. edizioa jokatuko da, sei mailatan banatuta. Benjamin, kimu eta gazteen lasterketak 10:45ean hasiko dira, eta kadete, heldu eta beteranoen mailakoak 12:00etan. Parte-hartze kopurua ikaragarria da aurten, guztira 750 korrikalarik izena eman baitute, eta dortsal guztiak bi aste lehenago agortu dira.

Faboritoen artean emakumezkoen azken hiru irabazleak nabarmendu dituzte: Sara Benedi (2024), Diana Vecillas (2023) eta Maria Ordoñez (2022). Gizonezkoetan, berriz, aipatzekoak dira Unai Ibarra, Angel Vazquez eta Ismail Chekjichek. Idiazabaldarrak ere ez dira faltako, Amaia Insausti, Maialen Urbizu eta Ainhoa Marquinez emakumezkoetan, eta Xabier Sanchez, Josu Urrestarazu eta Odei Zenitagoia gizonezkoetan.

Gaur, goizean, Izarretan Dantzan taldeak dantza modernoaren ikuskizuna eskainiko du, eta iluntzean, txistularien 32. alardea izango da protagonista. Igande arratsaldean, haurren danborradak alaituko ditu herriko kaleak 17:00etatik aurrera, jaietako azken kolore ukitua emanez asteburuari.

San Blas jaietako lehen asteburua ekintzaz beteta dator, herritarren eta bisitarien gozamenerako. Jaien hasiera ofiziala itxaron gabe, herriko kaleak festa giroz beteko dira dagoeneko.