Latinoamerika berria
EBk ez ditu behar bezala zaindu Latinoamerikarekiko harremanak. Multilateralismoaren garaian ikuspegiak aldatu behar dira
XX. mendearen hasieran, Argentina munduko herrialde aberatsenetakoa zen. Per capita errentaren zerrendan, bosgarren postuan zegoen, Alemaniaren aurretik. Buenos Aireseko urbanismoan eta eraikinetan islatzen da garai ... bateko aberastasuna. Gaur egun 86. postuan dago. Diktadura militar ankerrak izan dituzte latinoamerikar herrialde askotan, Estatu Batuen onespenarekin, Latinoamerika bere 'atzeko patioa' zela kontsideratzen zuenean hark. Diferentzia handiak daude herrialdeen artean, eta desberdintasun sozio-ekonomiko ikaragarriak estatu bakoitzaren barnean. Produkzio ekonomikoaren emaitza handienak gutxi batzuek eskuratzen dituzte. Familia aberatsek Miami zuten bigarren (edo lehenengo) bizilekua. Orain Madril. Ezkerreko alderdiak ari dira gobernatzen Latinoamerikako herrialde gehienetan, eta beraien arteko harremanak hobetzen ari dira. Oro har, erregio hori dezente aldatu da azken hamarkadetan.
Munduaren fokuak Latinoamerikatik (eta Afrikatik) kanpo daude, baina paper inportantea izan dezake erregio horrek munduaren bilakaeran. Latinoamerika eta Karibeko estatuek, 33 guztira, CELAC erakundea dute elkargune gisa. Eskumen eskasak ditu, baina interlokuzio politikorako baliagarria da. EBrekin bilera garrantzitsu bat egin du oraintsu. Azkena duela zortzi urte egin zen. Agintari europarrek Latinoamerika berri bat aurkitu dute. Bere buruzagi esanguratsuenek, Lula brasildarrak nabarmenki, argi diote ez dutela inoren menpe egon nahi eta maila berean jardun nahi dutela hitz egiten eta negoziatzen beste estatuekin. Herbehereetako lehen ministroak onartu zuen harrokeriaz jokatu duela EBk iraganean.
Mercosur elkarkidetza ekonomikorako erakunde bat da. Brasil, Argentina, Uruguai, Paraguai eta Venezuela dira bere kideak, eta beste zazpi estatu hari elkartuta daude. Nahiz eta EBrekin 2019an hitzarmen komertzial bat sinatu zuen, hori ez da oraindik indarrean jarri. Oker jokatu du EBk kontu horretan, oztopoak jarriz, eta Txinak aurrea hartu diezaioke. Dena den, lehen aipatutako bileran akordio garrantzitsuak hartu ziren: Global Gateway programaren arabera 45.000 milioi euroko inbertsioak egitea, Argentina, Txile eta Uruguairekin energiari buruzko hitzarmenak izenpetzea, eta abar. Hori guztia gauzatu egin behar da. Nolanahi ere, Latinoamerikako agintariek ez dute bloke-politikatik nahi, eta harreman komertzial eta politiko onak izan nahi dituzte mundu guztiarekin, interesen arabera, guztiek egiten duten bezala, morrontzarik eta menpekotasunik gabe. Multilateralismoaren garaian gaude.
¿Tienes una suscripción? Inicia sesión
