'Irabazi Arte' fikzioaren aurrestreinaldia, urtarrilaren 30ean Donostiako Kursaalean

Otsailaren 11n estreinatuko da 'Irabazi Arte', EITB komunikazio taldeak eta Pausoka ekoiztetxeak grabatu duten euskarazko fikzio berria. Azken urteotan Go!azen telesailak izan duen arrakastak sustatuta, neska gaztetxoen futbol-taldea oinarri duen seriea izango da. Aurrez, Donostian gazteei zuzendutako aurrestreinaldia egingo da urtarrilaren 30ean Donostiako Kurssalean telesailean parte hartuko duten aktore protagonisten partaidetzarekin.

Protagonisten bitartez, gaur egun gizartean ematen diren askotariko gaiak landuko ditu: hala nola, futbolaren inguruan eta kirolean bizi den giroa, emakumeen ahalduntzea, nerabeen eta gurasoen arteko harremanak, familia, eta, oro har, gaur egungo nerabeek dituzten erronkak islatuko dituzte.

Donostiakoaz gain beste hiru aurrestreinaldi antolatu dira: gaur larunbata Gasteizen Europa Jauregian 17:30ean, Bilboko Euskaldunan otsailaren 5ean 12:00etan eta Iruñeko Baluarten otsailaren 6an 12:00etan ere. Guztietarako gonbidapenak eskuragai daude aretoetako webguneetan.

Protagonistak, besteak beste, Sua Enparantza, Iker Galartza eta Jose Ramon Soroiz dira. Ane Iturrate, Nahia Sillero, Ane Gamendia, Ainhoa Azpitarte, Joana Garitano, Ibai Ugarte eta Ander Rovira ere izango dira.

Musikak garrantzia berezia izango du ekoizpen honetan. Alde batetik, Chill Mafia kolektibo nafarreko Irenek, Kiliki Freskok eta Suneok egin dute karetako abestia. Bestalde, egungo euskal talde garrantzitsuenetako batzuen musika tartekatuko da. Besteak beste, lehen atalean ZETAK, Bengo eta Omagoren abestiak entzungo dira, Oso Polita diskoetxearen eskutik.

Temas

• Euskera
• Euskal Telebista
• Zabalik