Nerea Ibarzabalek irabazi du larunbat honetan Gotaine-Irabarneko saioa

Nerea Ibarzabal nagusitu da larunbat honetan Gotaine-Irabarneko (Zuberoa) bertso saioan. Herriko gela goraino bete dute bertsozaleek Eneko Lazkoz, Patxi Iriart, Oihana Iguaran, Nerea Ibarzabal, Julio Soto eta Ane Labaka kantuan entzuteko. Aritz Bidegainen gidaritzapean eta hark jarritako gaiei erantzunda Ibarzabalek lortu du puntuazio altuena, 738, eta azaroaren 5ean Irunen izango den final aurrerako txartela erdietsi zuen. Hala, oholtzara igoko da Sustrai Colina eta beste sailkatuekin batera.

Zortziko nagusiko eta txikiko lanak amaituta, puntu erantzunen txanda izan zen. Ostean, bertsolariek hamarreko txikiko eta ganbarako ariketei egin zieten aurre. Azken honetan Bidegainek jarritako gaia medikuari egindako kontsulta izan zen. «Medikuaren kontsultatik irten berri zara. Telefonoa sakelatik atera duzu». Lanak amaituta Iguaranek 737,5 puntu, Labakak 694,5, Sotok 691, Lazkozek (649,5) eta Iriartek (604,5). Bostek datozen saioei itxaron beharko diete finalaurrekoetara sailkatzeko aukera izango duten jakiteko ala ez.

Lehen fasea epaitzeko lanetan Egoitz Iradier, Eneko Bidegain, Jurgi Fuentes, Karlos Ibarguren, Leire Beloki, Miriam Juaristi eta Saioa Mitxelena aritu dira.

Aste-bukaerako azken saioa gaur igandea 17:00etan Gasteizko Europa Jauregiko Maria de Maeztu entzunaretoan izango da. Sarrerak eskuragai daude www.bertsosarrerak.eus atarian.

Temas

• Bertsolari Txapelketa Nagusia
• Bertsolaritza