Musikak Azpeitiko Sanagustin kulturgunea beteko du

Musika izango da aste-bukaera honetako protagonista nagusia Azpeitiko San Agustin kulturgunean bi kontzertu bikoitzekin. Ostiralean ateak 22:00etan irekiko dira, lehenik Sara Azurza arituko da eta ostean Chica Sobresaltok eskainiko du kontzertua. Sarreraren prezioa 18 eurokoa da eta internet bidez zein unean atean eskura daitezke.

Duela gutxi aurkeztu zituen Chica Sobresalto iruindarrak 'Oráculo' izeneko hurrengo albumaren lehen bi aurrerapenak, La Estrella' eta 'La Torre', eta 'Poquita Cosa Tour' biraren baitan Sanagustin kulturgunean eskainiko duen kontzertuan ohiko abestiez gain zuenean eskainiko ditu.

Azken kontzertuetan kontrastez betetako ikuskizuna eskaini du Chica Sobresaltok, non argirantz pauso bat eman eta aurreko biran lagun izan zuen melodramaren zati bat kenduko duen. Bidaide izango ditu harekin hasiera-hasieratik izan diren taldekideak: Aritz Legarrea (bateria), Ander Arlegui (baxua eta sinteak), Gorka Cia (gitarra eta sinteak) eta Marta Irizibar (pianoa eta koruak).

Aurrez oholtzaratuko da Sara Azurza donostiarra otsailean kaleratu zuen 'Hemen berriro' lehen diskoa aurkezteko. Pop-soul estilotik gertu koka daitekeen, kutsu elektronikoa duten eta Erresuma Batuko emakumeen -Adele, Amy Winehouse, Joy Crookes, Cleo Sol, Arlo Parks, Jorja Smith, Lianne La Havas edo ENNY- eragina duten bederatzi kantuk osatzen dute Azurzaren lehen lana eta abestiak «denetarikoak» dira, euskaraz, ingelesez zein frantsesez. «Abestiei identitatea ematen dien elementua ahotsa dela esango nuke», azaldu zuen.

Larunbatean Ezpalak eta Havalina taldeen txanda izango da. Ateak 22:30ean irekiko dira eta sarreraren prezioa 15 eurokoa da. Hainbat taldetako kideak batuta sortu zen 2019an rock alternatiboa egiten duen Ezpalak. Durangoko Azokan aurkeztu zuten hirugarren lana, 'Hortz aina Hots', eta larunbatean bertako 10 kantuez gain aurretik plazaratutako bi diskoetako –'Ezpalak' eta 'Kolpatu Topatu'– abestiak ere eskainiko dituzte. Anbizio handiagoko soinua eta ekoizpen gaurkotuagoa da hirugarrena, sintetizadoreak sartuta, eragin berri eta garaikideekin.

Jarraian Havalina hirukote madrildarrak laurogei hamarkadako pop-rock-a eskainiko eta hamargarren diskoa, 'Maquinaria' aurkeztuko du. Tarteka ukitu ilunekin eta Cure taldearen kutsuekin, 20 urteko ibilbidea nahikoa berme bada kontzertura bertaratzeko.

Temas

• Euskal musika