Portugalen estreinatuko da Arantza Santestebanen '918 gau' filma

Arantza Santestebanen '918 GAU' filma aste honetan iritsiko da Portugalgo zinema-aretoetara. Filma ostegun honetatik asteazkena arte ikusi ahal izango da Lisboako Cinema Ideal aretoan. Estreinaldian filmaren zuzendaria egongo da proiekzioa aurkezten eta ondoren bertaratutako ikusleekin solasaldian parte hartuko du. Ostiraleko emanaldia Isabel do Carmo mediku eta aktibista politiko portugaldarra izango da aurkezle.

Portugalen egingo den filmaren estreinaldia 6.doc programan kokatzen da. Programa honek DocsLisboa jaialdiaren azken edizioan estreinatutako filmetako batzuk aurkezten ditu, non Santestebanen opera primak Nazioarteko Saileko Film Onenaren saria eskuratu zuen. Torino Film Festivaleko Nazioarteko Dokumental Onenari eta Pontevedrako Novos Cinemas Nazioarteko Jaialdiko Latexos sariari gehitu behar zaie sari hori, L'Alternativa - Bartzelonako Cinema Independent Jaialdian parte hartzeaz gain.

Lisboatik igaro ondoren, apirilean, '918 GAU' Porto hirian, Cinema Passos Manuel aretoan ikusi ahal izango da, Há Filmes na Baixa! Programaren barruan, Porto/Post/Doc jaialdiarekin lankidetzan. Gainera, martxoaren 14tik 19ra bitartean Iruñean ospatuko den Punto de Vista-Nafarroako Zinema Dokumentalaren Nazioarteko Jaialdiaren 16. edizioko Sail Ofizialean lehiatuko da filma.

Euskaraz filmatu eta 65 minutuko iraupena duen filma Arantza Santestebanek idatzi eta zuzendu du, eta Irati Gorostidi da zuzendari laguntzailea. Maddi Barberrek sinatzen du Argazkilaritza zuzendaritza, Mariona Solék muntaia eta Alazne Ameztoyk zuzeneko soinua. Iker Álvarez zuzendaritza artistikoaren arduraduna da. Marian Fernández Pascal eta Marina Lameiro dira ekoizle exekutiboak. Aktoreen artean Arantza Santesteban bera, Mirari Echavarri, Mercé Salom, Manon Praliné eta Maryann Peony daude.

Zuzendariaren hitzetan, «narrazio zatikatu honek kolektibitatearen zentzuaren galera eta bizitza berri baten saiakera ekartzen ditu gogora. Pertsonaiak soslaiz agertzen dira beti, eta hori ez da kasualitatea. Ez da aurrez aurre begiratzen duen begirada bat, baizik eta begirada ezegonkor bat, saiheskakoa, eta horrek tolestura ugariko narrazio ibiltari bat sorrarazten du. Garrantzitsua iruditzen zitzaidan aktibismo politikoei buruzko istorioen gainean eratzen diren kontakizun erromantizatuak zalantzan jartzea. Kontatu nahi izan dudan istorioak, kontakizun heroiko bat hauspotzeaz harago, subjektu politizatuak irudikatzeko ohiko logiketatik ihes egin nahi du».

Ondotxo daki zuzendari nafarrak zertaz ari den. 2007ko urriaren 4an atxilotu eta espetxeratu zuten. Zenbait oroitzapen gordetzen ditu egun haietatik: patioko joan-etorri amaigabeak, igeriketa-lehiaketak, Rasharen bizipen latzak kartzelan… 918 gau giltzapetuta eman eta gero, Arantza aske geratu zen. Handik aurrera, grabagailu batean jaso zituen bere oroitzapenak eta zalantzak, eta filmean zehar azalduko zaizkigu, memoria zatikatu baten eran.

Filma 2019 eta 2020ko hainbat hilabetetan garatu zen. Denbora horretan, zinemagilearen artxiboa filmatu zen, haren biografiako leku garrantzitsuak bisitatu ziren, Segura edo Berlin kasu, eta espazio batzuk birsortu ziren. '918 GAU' Txintxua Filmsek eta Hiruki Filmak ekoiztu dute. EITBren parte-hartzea du, eta ICAA, Eusko Jaurlaritza, Nafarroako Gobernua eta Gipuzkoako Foru Aldundiaren laguntza ekonomikoa. Filmak Donostia Zinemaldiak, Tabakalera Kultura Garaikidearen Nazioarteko Zentroak eta Elias Querejeta Zinema Eskolak bultzatutako Ikusmira Berriak 2018 programan parte hartu du, baita Donostia Zinemaldiko Work in Progress Europe 2020 foroetan eta Abycine Lanza Work In Progress 2020 foroetan ere, MAFIZ saria irabazi baitzuen. Filma 2022an estreinatuko da, Begin Againen banaketarekin.

Temas

• Zabalik
• Zinema