Arabako, Bizkaiko, Gipuzkoako eta Nafarroako 47 herritara helduko da Zinegoak jaialdia

Astelehen honetan hasi eta martxoaren 7ra arte luzatuko da Zinegoak LGTBI+ zinema eta arte eszenikoen jaialdia Bilboko hainbat aretotan, «zinemaren eta kulturaren bidez sexu eta genero aniztasuna aldarrikatzeko». Aurtengo berritasunen artean, film laburren bi ziklo estreinatu eta nazioarteko zinemagile eta epaimahaien bisitak berreskuratuko ditu.

Film luzeen sail ofiziala hiru kategoriatan banatuko da berriro: DOK (dokumentalak), FIK (fikzioak) eta KRAK (narratiba berriak). Guztira 16 film luze ikusi ahal izango dira sail ofizialean, Golem Alhondiga zinema aretoetan. Gainera, jaialdiak Filmin plataforman duen leiho digitalean ere ikusi ahal izango dira, aurrez aurreko proiekzioak amaitu ondoren.

Zinegoak Euskal Herriko hainbat herritan zehar ere ibiliko da, ZG Hedapena programari esker. Programa horren bidez, sexu aniztasunarekin lotutako ikus-entzunezko edukiak bultzatu nahi dira herri txikietan ere. Aurtengo edizioan, Arabako, Bizkaiko, Gipuzkoako eta Nafarroako 47 herrik hartuko dute parte.

Film laburrei dagokienez, 'Emakume zuzendariak' eta 'Haurtzaroa/nerabezaroa' ohiko zikloez gain, aurtengo edizioan bi ziklo berri izango dira: 'Maitasunezko poliedroak', harreman afektibo-sexualen formulei buruzkoa, eta 'Trantsizioak', arreta trans errealitateetan jarrita. Guztira, 22 film labur lehiatuko dira sail ofizialean eta doan proiektatuko dira Bilborocken.

Gainera, aurreko edizioetan bezala, 'Erroak' film laburren zikloak Euskal Herrian sortutako lanak bilduko ditu, eta aurtengo edizioa lau eskainiko dira. Lan horiek Lekeition ere proiektatuko dira, bigarren urtez Zinegoak jaialdiaren egoitza ofiziala izango baita.

Sail ofizialeko film guztiak lehiatuko dira Zinegoak Sari Nagusia eskuratzeko: lehenengo aldiz 4.000 euroko balioa izango du, EITBren babesarekin. Garailea martxoaren 7an Bilborocken egingo den amaiera ekitaldian emango dira ezagutzera, eta gainerako sariak ere jakinaraziko dira: Publikoaren Saria, Giza Eskubideak eta Aniztasuna, Lesbianismoa eta Generoa, Gazte Epaimahaiaren eta Seniorren sariak eta abar. Gainera, jaialdiak ZG PRO topaketa profesionala indartuko du martxan dauden proiektuen aurkezpenekin, klase magistralekin eta Europako LGTBI+ jaialdien topaketarekin.

Temas

• Zabalik
• Zinema