Andatza hegoaldean parke eolikoa eraikitzeko asmoa dute

Ostegunean Gipuzkoako Aldizkari Ofizialean argitaratutako iragarkiaren arabera, Green Capital Development enpresak lau aerosorgailu izango dituen parke eolikoa eraiki nahi du Andatza hegoaldean dagoen Ezkeltzu mendian.

Sorpresaz eta harriduraz harrapatu du Udala parke eolikoaren proiektuak: ez zuen horren berri, Gipuzkoako Aldizkari Ofizialean argitaratu duten arte. Albistea jakin bezain pronto, aztertzen hasi da zer proiektu den eta prozedura aldetik zein fasetan dagoen. GAOko iragarkiaren arabera, Ezkeltzun, Andatza hegoaldean, lau aerosorgailu lituzkeen parke eoliko bat ezarri eta ustiatzeko interesa duten pertsona fisiko edo juridikoek eskabideak lehian aurkezteko 20 eguneko epea ireki dute. Zizurkilgo eta Usurbilgo udalerriei eragingo lieke proiektuak, nahiz eta, argitaratutako koordenatu geografikoen arabera, batik bat Zizurkilgo eremuan eragingo lukeen.