2021eko eta 2022ko herriko kultur sormena diruz lagunduko du Udalak

Herriko kultur sormena laguntzeko dirulaguntza deialdia egingo du udalak, lehenengo aldiz. Aurreikuspenen arabera, martxo hasieran irekiko da eskatzeko epea, gainerako dirulaguntzekin batera, eta 20 egun balioduneko epea izango da eskatzeko. Udalak, guztira, 30.000 euro bideratuko ditu 2021ean eta 2022an burutako lanak laguntzera. Lerro berri horren inguruko informazioa emateko bilera egin zuten atzo, Potxoenean.

Hainbat helburu ditu dirulaguntza lerro berriak: sormena bultzatzea, kultura sare eraldatzaile, dinamiko eta parte-hartzailea sustatzea, herritarrek gozatzeko kultur eskaintza erakargarria, anitza, hurbila eta eskuragarria sortzea, eta, era berean, bertako kultura balioan jarri eta gizarte integratzailea eraikitzen laguntzea. Diruz lagunduko dira, halaber, arte eszenikoak eta performatiboak, arte plastikoak, musika-arteak, literatura-arteak, ikus-entzunezkoak zein beste zenbait kultur adierazpen artistiko sortzeko edota garatzeko proiektuak.

Kultur eskaintza zabala du Usurbilek, baina sorkuntza ez da zuzenean lagundu izan, Luken Arkarazo zinegotziak bileran nabarmendu zuenez: «Usurbilek badu bere esentzian eta errealitatean kulturgintzarako gogoa, jarduna eta zeresana. Sorkuntza zuzenean ez da lagundu izan, ordea: hutsune bat zegoen hor». Gaineratu zuenez, udal-gobernuak osatutako Legealdiko Planean jasoa dute neurria. Laguntza berria kultur munduan lehendik ere badabiltzanei zein hasiberriei irekia dagoen arren, lehenengo lana izatea kontuan hartuko dute, eskaerak baloratzerako orduan.

Hainbat irizpide hartuko dituzte kontuan eskaerak baloratzerako orduan. Sortzailearen lehenengo lana izan edo ez izateaz gain, lanaren originaltasuna, sormena eta berritzailetasuna; herriko kultur eta gizarte dinamikekiko lotura; ingurumena, euskara, parekidetasuna, kulturartekotasuna... bezalako alorrekiko erantzukizuna eta eskaeraren lanketa, zehaztasuna eta argitasuna. Norbanako edo talde bakoitzaren lan bat baino gehiago lagun litezke diruz, baina eskatzaile bakoitzeko muga 3.000 eurokoa izango da. Horrez gain, lanek jatorrizkoak izan behar dute, eta ez dira onartuko 2021 baino lehenago hasi edo amaitutakoak.