Sinergia Orio taldea, Euskal Ligako Txapelketan Etxebarrin
Txapelketa gaur zabalduko dute
Sinergia Orio jubenil mailako eskubaloi taldeak Euskal Ligako Txapelketako finala jokatuko du asteburu honetan Bilbao ondoan dagoen Etxebarri herrian. Denboraldiko lau talde onenak bilduko dira bertan, Euskadiko txapelketaren bila eta aldi berean Espainiako sektorera sailkatzeko helburuarekin. Kukullaga, Aiala Zarautz, Bidasoa eta Sinergia Orio dira lau taldeak.
Txapelketa gaur arratsaldean hasi eta igande eguerdian amaituko da. Eta hasteko, Gari Garagarzak entrenatzen duen taldeak gaur iluntzeko 20:30ean, etxeko taldearen aurka egin beharko du aurre, Kukullaga Etxebarri. Atseden handirik gabe, bigarren jardunaldian, bihar goizean, 11:00etatik aurrera Orioko neskek Aiala Zarautz izango dute arerio eta, txapelketa amaitzeko, igande goizean, 11:00etan Bidasoaren aurka jokatuko dute. Orioko neskei armailetatik familiarteko eta lagunen animorik ez zaie faltako.
