Getaria

TopaHika! Hika garagardo saioak zabalduko du Getariako Euskaraldiko egitaraua

Aurtengo Euskaraldia badator. Aurtengoa udaberrian izango da, hilaren 15etik 25era egingo da hizkuntz ohiturak aldatzea helburu duen ariketa soziala. Ahobizi ala belarriprest, getariar ugari daude txapak janzteko prest.

Ostiral honetan, arratsaldeko 18:30etik 20:00etara eta larunbatean eguerdiko 12:00etatik 13:30era herriko plazan izango da aukera berria txapak jasotzeko.

Euskaraldiaren egitaraua gaur zabalduko dute, eta TopaHika! izenburu duen egitasmoa burutuko dute. 'Hika-garagardo saio' gisan izendatu dute ekintza. Frontoian izango da, eta honakoa da egitaraua: 19:00etan 'Ba al dakin/k nola egiten dan garagardoa?' saioa prestatu dute eta, amaitzean, Hikadromoa izango da 19:30ean. 20:00etan, bestalde, garagardo eta pintxo-potea izango da, photocall-arekin batera.

Horrez gain, Euskaraldiko egunen baitan, bi ekintza prestatu ditu batzordeak: hasiera ekitaldia maiatzaren 15ean egingo dute, 19:00etan. Larunbatean, hilaren 17an, aldiz, Zarauzko gitarra taldearen kalerija prestatu dute, 19:30ean hasita.