Kilometroak jaien atariko 'Kultur Izpiak' programa azaleratu du Azpeitiko Ikastolak

Honela, herriko eta herriz kanpoko eragileekiko harremana landu dute eta azken hiru hilabeteetan egindako lanketaren emaitza aurkeztu dute .

Horren berri emateko elkartu dira Alaitz Epelde Ikastolako Artezkaritzako kidea, Gorka Artola Kilometroak 2024ko koordinatzailea, Mattin Arakistain eta Miren Iturzaeta Ikastolako Batxilergoko ikasleen ordezkariak, eta Alaitz Perez de Arenaza, Kilometroak Kultur Elkarteko lehendakaria.

Eguzki lorea da 2024ko Kilometroak jaaaren irudia eta 'Izpiz izpi' leloa. Horren baita, hiru ardatz ezarri dira aurtengo ikasturtean lantzeko: euskara, kulturartekotasuna eta aniztasuna, eta herrigintza. Alaitz Epeldek adierazi duenez, «ardatz horiek ez ditugu arrotzak ikastolan, baina badakigu jarritako helburuak handiak direla. Aurtengo kilometroen urtean ardatz hauen lanketari begirako oinarriak jarri nahi ditugu. Aurrerantzean ere ardatz horietatik abiatuta lanean jarrai-tzeko».

Urriko jai handiak kanpora begira garrantzia handia izango badu ere, ikasturtean zehar landutakoari garrantzia eman nahi diote Ikastolako ordezkariek: «Izan ere, hasiera-hasieratik izan dugu argi oinarri horiek sortzeko, bidea egitea zela egokiena. Eta urriko jaiari garrantzia emateaz harago, urtean zeharreko harreman lanketa egitea nahi genuela. Herrian bertan eta herritik kanpo», azpimarratu du Epeldek.

Aurtengo Gipuzkoako ikastolen jaiari lotuta «txikira jotzea» erabaki da. Hala eman du aditzera Gorka Artola KMK 2024ko koordinatzaileak. Bera arduratu jaiaren atariko programazioaren xehetasunak azaltzeaz. «Ekintza xumeak, baina helburu handiak» ditu antolatutako bideak eta ekin-tza xume horien programa da kultur-izpien bidez aurkeztu nahi izan dena. «Jaia egun bakarrera mugatu beharrean, urte osoan aurtengo kilometroen ardatzak lantzeko ekintzak sortu eta proposatzen ari gara herriko eragileekin harremanetan», azpimarratu du

Kilometroak jaiaren aurretik, bi lanketa egiten ari dira. Alde batetik, harreman mota askotarikoak eraiki herriko eragileekin elkarlanean, eta baita herriz kanpokoekin harremanetan ere; eta bestetik, harreman horietan sortzen diren asmoetatik, ekimen mugarriak gauzatu. «Gure asmoen berri eman eta lankidetzarako aukerak eskaini dizkiegu, eta beste batzuekin dagoeneko dugun harremana baliatuz, elkarrekin lankidetzan abiatuak gara. Kilometroen urtea, harreman urtea izatea nahi dugu, eta harreman horietatik hiru ardatzak elikatuko dituzten proiektuak elkarrekin irudikatu», jakinarazi du aurtengo kilometroetako koordinatzaileak.

Kultur izpien egitaraua otsailaren 9an hasi zen eta irailaren 1ean amaituko da. Hala ere, egitarauari amaiera data jarri diete baina ekimen metaketa honek «jarraipena izatea» dela helburua zehaztu du Artolak.

Ekitaldi horien guztien artean, apirilaren 19an Ikasle Topaketak antolatu dituzte. Euskal Herriko lurralde ezberdinetako ikasleak elkartuko dira Azpeitian eta jai giroan «gure intereseko gaiak landu eta ondo pasatzeko» bidea izango da, azaldu dute Mattin Arakistain eta Miren Iturzaeta ikasleek.

Momentuz, ikastolen festak antolatu dituzten ikastolekin jarri dira harremanetan eta «Oiongo eta Zangotzako ikastoletako ikasleak» etorriko direla Azpeitira aurreratu dute eta «euskararekin eta euskaraz ondo pasatzeko egun bat» izatea nahi dutela esan dute.

Azkenik, Alaitz Perez de Arenazak aurrekoengandik jasotako ondarea trasmititzeko garaia dela azpimarratu zuen eta «herriak Ikastolari emandakoa, berriro ere herrira itzultzeko plaza paregabea» izango dela Azpeitia esan zuen. «Gure nortasunaren, euskalzaletasunaren eta konpromisoaren erakuslehio paregabea izango da, elkarrekin indartsuagoak garelako, gu Ikastola garelako!», amaitu zuen ikasleekin elkartu eta argazkia ateratzeko.