Azkoitia

Duatloi festak hartuko du Azkoitia asteburuan eta bi egunetan kirola nagusituko da

Asteburuan duatloiaren hiriburu bilakatuko da Azkoitia. Dena prest dute Azkoitri triatloi taldeko kideek Azkoitiko duatloiaren edizio berri bat ospatzeko. Horren berri emateko elkartu dira antolatzaileak aste honetan. Haritz Uranga Azkoitiko Duatloiaren arduradunak, Aitor Benitez Azkoitri triatloi klubeko lehendakariak, Nekane Zalbide Marea Urdinako kideak eta Lia Ariño Azkoitiko Udaleko kirol teknikariak eman dituzte xehetasunak.

Nobedade nagusia aurtengo ekitaldia bi egunetan izango dela da, antolatzaileek azaldu dutenez, «trafiko arazoak ekiditeko». Horrenbestez proba nagusia igandean izango da.

Honela, zapatu goizean haurren probak izango dira, herrigunean. Adinaren arabera banatuko dituzte saioak. 9:30etik hasi eta 12:00ak bitartean, LH1eta LH2ko haurrek 200 metro lasterka, kilometro bat bizikletan eta beste 100 metro korrika egin beharko dituzte. LH3-LH4ko umeek 500 metro korrika, bi kilometro bizikletan eta ehun metro korrika egingo dituzte. LH5 eta LH6ko umeek, berriz, 500 metro korrika, hiru kilometro bizikletan eta 200 metro korrika egingo dituzte.

Arratsaldean, supersprint distantziako partaideentzat probak izango dira. 2,5 kilometro korrika, 10 bizikletan eta 1,25 berriro ere lasterka egin beharko dituzte partaideek. 16:00etan paraduatloiko partaideak irtengo dira eta bi minutuko tartearekin emango zaie hasiera gizonezkoen, emakumezkoen eta kadeteen probei.

Goizeko nahiz arratsaldeko probetan aniztasun funtzionala duten hainbat herritarrek parte hartuko dute Marea Urdinaren laguntzaz. Nekane Zalbidek eskerrak eman zizkien antolatzaileei aniztasun funtzionala dutenei ere halako probetan parte hartzeko aukera emateagatik. Izan ere, kirola eskubide bat baino gehiago dela herritarrentzat nabarmendu zuen. «Kirolak buru osasunari zein osasun fisikoari onurak ekartzen dizkio. kirola ezinbestekoa da osasunerako eta gure herriaren parte sentitzeko. Horregatik, eskerrak antolatzaileei aukera emateagatik; guk gogotsu parte hartuko dugu», esan zuen.

Igandean, 10:00etan hasita, distantzia motzeko duatloia jokatuko da eta Gipuzkoako txapelketa izango da proba. Hamar kilometro korrika, 40 kilometro bizikletan eta bost kilometro korrika egin beharko dituzte partehartzaileek. Nuarbe, Errezil eta Azpeitia zeharkatuko ditu lasterketak. Beraz, kirolariak errepidean diren bitartean, ibilgailuentzat erabat itxita egongo da bidea lasterketaren noranzkoan. Azkoitia eta Azpeitia arteko zatia 10:45etik 12:30era bitartean itxita egongo dela aurreratu dute.

Antolatzaileak gustura agertu dira duatloiak gero eta harrera hobea duela-eta. Igandeko proban, esaterako, 178 lagunek eman dute izena, iaz baino hogei gehiagok, eta hamabost dira emakumeak. Azkoitriko hamar lagunek hartuko dute parte, bederatzi gizonak eta bestea emakumea.

Bestalde, proba antolatzeko 8.000-9.000 euroko aurrekontua izan dutela zehaztu dute Azkoitriko kideak. Horren harira, Azkoitiko Udalari eta inguruko enpresei esker ona luzatu diete laguntzagatik . Inguruko udalak ere eskertu dituzte eta batik bat boluntarioak goraipatu dituzte. Hauen laguntza «ezinbestekotzat» jo dute.

Temas

• Azkoitia