Julia Lasa eta Naiara Goikoetxeak jasoko dute 'Hondarribia Sormen Hiria' beka

Hamarkada bat baino gehiago jarduerarik gabe zeraman Artista Beka ekimena berreskuratzeari ekin dio Hondarribiko Udalak eta 'Hondarribia Sormen Hiria' bezala plazaratu du. Julia Lasa eta Naiara Goikoetxea izango dira bekadunak.

Deialdi honekin, Hondarribiko Udalak «apustu irmoa egin du kulturaren alde, garapenaren, memoriaren eta berrikuntzaren ardatz gisa. Hautatutako proiektuak datozen hilabeteetan garatuko dira, eta herritar guztiei irekitako erakusketa publiko batean amaituko dira». Agintaldi Kulturalaren Planean beka hori berraktibatzeko konpromisoa hartu zen eta 2025eko Udal Aurrekontuetan ere islatu zen, sorkuntza artistikora bideratutako partida espezifiko batekin.

Sei artista aurkeztu ziren eta epaimahaiak (Idoia Seijo, Jonan Basterretxea, Goio Uriarte eta Maddi Carton)nabarmendu du diziplina ugari daudela ordezkatuta –argazkigintza, ilustrazioa, ikus-entzunezkoa, poesia, pintura– eta ikerketa, dokumentazio- eta komunitate-loturako prozesuak oso zehatzak izan direla.

Julia Lasak 'Hutsa-Desierta' proiektuarekin irabazi du beka. Tokiko artista bisuala da, bere lanak paisaia, memoria eta lurralde-eraldaketa aztertzen baititu. Bere proiektua ilustrazio poetiko bat da, Napaldala GKEarekin eta Katmandu-ko 12 emakumerekin lankidetzan egina.

Naiara Goikoetxeak aldiz '470 nm' aurkeztu zuen. Bere lanak argazkia eta argi-artea konbinatzen ditu, eta argiaren, lurraldearen eta kultura-pertzepzioaren arteko erlazioa aztertzen du. Bere proposamen artistikoa hainbat ardatz edo kontzeptu dituen sormen-prozesu batean oinarritzen da; prozesu hori hiru obra handitan, material didaktikoan eta erakusketa batean gauzatzen da.

Epaimahaiak nabarmendu du proposamen guztien kalitate eta interes artistiko handia, denek merezi zutela beka, nahiz eta deialdiaren markoak bi irabazle bakarrik hautatzeko aukera ematen zuen. «Jasotako proposamenek barru-barrukoari eta kolektiboari buruzko begirada sakona islatzen dute: euskara, paisaia, herritarrak, etnografia. Proposamen guztiek tokiko kulturari balioa emateko asmoa zuten».

Estitxu Ortolaiz 'Denboraren makina'rekin aurkeztu zen. Argazkilaria, ibilbide ederra duena emakumeek landa-eremuan eta itsas eremuan egindako lana dokumentatzen (Hariya, Haziya). Bere proposamenean, argazki-ibilbide parte-hartzaile bat egiten du herrian zehar, atzoko, gaur eta biharko irudi nahasiekin.

Ane Gómez Bogotán bizi den artista hasiberria da. 'Bogotá' izeneko bere lana identitatean, memorian eta lurraldean zentratzen da. Bogotako oihalen bidez Txingudiko paisaiara hurbiltzea nahi du.

Rosa Arocenak 'Goara Garbia' ipuin ilustratu bat proposatzen du. Ipuin horrek ibilbidea egiten du hiriko hamar auzoetan zehar, labanderak ardatza izanik, paisaia eta ingurunearen garbiketa sinbolikoa aztertuz.

Oier Gil ilustratzailea eta diseinatzaile grafikoa, 2024ko Hondarribiko jaien kartelaren irabazlea. 'Topaketa baten istorioa'n Boscoier markari buruzko dokumental labur bat egin nahi du .