Zorionak artikuluagatik, baina...

Zorionak eman behar dizkiot Cristina Turrau -ko kazetariari Ostiral Santuan Loiolako Gogartetxeari buruz idatzi zuen artikuluagatik. Ni izan nintzen elkarrizketatuetako bat eta nire ustez, jakin izan zuen harrapatzen gutako bakoitzaren istorioaren muina eta errespetu handiz paper gainean jarri.

Baina, niri dagokidanez, bi akats zituen bere idatziak, bata nik eraginda beharbada, eta bestea bere uste oker baten ondorio. Lehena da «ex-sacerdote» izendatzen nautela. Ni ez naiz inoiz apaiza izan, erlijiosoa baizik, anaia, «hermano» esaten zaion moduan. Hor nire akatsa egon liteke, ez niolako hori ondo azaldu. Baina bestean, nik uste, berak sartu du hanka. Izan ere, nik denbora guztian «bikoteari» buruz aritu nintzen («pareja»), eta ez nuen «novia»/neskalaguna hitzik aipatu. Izatez, nire kasuan, «novio» litzateke egokiena, mutil-laguna, alegia. Baina artikuluaren hasierak horrela dio: «Koldo Rodríguez es de Vitoria, tiene 49 años y busca novia».

Ez da larriegia, baina nire mutil-laguna bilatzeko prozesuan, laguntza beharrean, oztopo bihur daiteke entrebista hau, ze pena!

Dena den, plazera izan zen harekin egon eta gure esperientziaren zati bat kontatu ahal izatea. Hanka-sartze logiko horiek gorabehera, oso kazetari ona dela iruditzen zait. Segi horrela!