Orain arteko saiorik onenean, Colina nagusi

Orain arteko saiorik onenean, Colina nagusi
GARI GARAIAIALDE/XDZ

Sei bertsolariak oso fin jardun ziren atzoeta entzulegoaktxalo zaparradekin eskertu zuen

BIANDITZ IRAOLAAMURRIO

Sustrai Colinak irabazi du Amurrioko saioa. Saio polita izan zen atzokoa, orain arteko entzungarriena, hasi eta bukatu goitik egin baitzuen; sei bertsolariak oso erregular, bikain aritu ziren, eta entzulegoak txalo zaparradekin eskertu zuen behin baino gehiagotan.

Colina 701 izan zen garaile, eta bigarren gelditu zen, 694,5ekin, Beñat Gaztelumendi. Honela osatu zen sailkapena: hirugarren, Jon Maia (681,5); laugarren, Nerea Ibarzabal (675,5); bosgarren, Jon Martin (668,5) eta seigarren Etxahun Lekue (615).

Zortziko txikian lehen bi sailkatuak batera aritu ziren. Beñat Gaztelumendi aireportuan zen, Colina poliziarekin segurtasun kontrola pasatzen. Hirugarrenez pasarazi zuen metal detektagailutik, eta hirugarrenez jo du gailuak. Kexaka hasi zen añorgarra: «Hau da zalaparta ta hau da iskanbila / nik galtzetan ez dauzkat bada gauza pila / ez zera ba ondotik ariko mutila / ni biluzik jartzeko aitzakia bila». Colinak arrazoia eman zion: «Pentsatu behar zenuen gaur baino lehenago / begiz jota eukitzen dut bat ilararo / aitzaki bila nabil klaro Beñat klaro / eta zu laztantzeko desiatzen nago». Gaztelumendik autoritate handiegirik zuenik ez zuela ematen bota zion orduan: «Ez nago ziur hori aguanta nezakeen / laztandu nahi nauzula zabiltza esaten / sobran kabitzen zera uniforme baten / Sustrai beldur handirik ez dezu ematen». Ez zen beldur kontua, ordea, Colinaren ustez: «Orain artean ez dut nik inor birrindu / beraz kantzontziloak lurrakin berdindu / ikutu zaitut eta ia maitemindu / zure detektoreak pi-pi-pi egin du».

Zortziko nagusian, berriz, Etxahun Lekuerekin aritu zen. Euren elkarte gastronomikoan lapurretak izan zirela-eta, segurtasun kamerak jarri nahi zituen bizkaitarrak. Urruñarra berriz, ez zegoen batere alde. Hasieratik hartu zion susmoa Lekuek, lapurra bera izan zitekeela, baina Colinak horrek edozein susmagarri bihur zezakeela esan zion. Lekueren argudioa: «Nire ingurua antza ez doa zeurea doan lekura / konponbide bat gurako neuke sozio gehienen modura / ta antza danez zuk kamararik tartean ez dozu gura / eta lapurra harrapatzeko zer proposatzen dozu ba». Gizalegea jarri zion aurretik Colinak orduan: «Nik etiketan oinarritzen dut espazio amankomuna / nola zaintzen da biltegia ta nola zaintzen da komuna / nahiz ta besteak kontrolatu nahi pasatzen dugun eguna / geure buruak kontrolatzea da ikasi behar duguna».

Maia eta Ibarzabalen saioa

Aipatzekoa baita ere Jon Maiak eta Nerea Ibarzabalek egindako lana. Adineko bikotea izatea tokatu zitzaien, gazte garaiko argazkiei begira. Maiari iraultzaileak kontserbadore bihurtu zirela iruditzen zitzaion, ez hala Ibarzabali. Maia hasi zen: «Begira zure galtza kanpanak ta begira nere kaiku / argazki atzean Che, Fidel, Lenin haien esaldi ta aipu / nahiz ta agian lehen bezelaxe pentsatzen biok jarraitu / mundua aldatu nahi genuen ta munduak aldatu gaitu». Ibarzabalek heldutasuna ikusten zuen: «Mundua joan da noizpait geneuzkan lakartasunak leuntzen / baina orain begiratzen dugu arazoetara zuzen / ta eguneroko erabakitan gu aldaketak burutzen / iraultza ez da belarritako aro kopurutan neurtzen». Aroak eman zion zer pentsatua kontserbadore ustekoari: «Baina arotik pasatu gera gauza guztitan funtsean / begira ogia erostera nola zoazen kotxean / tximini baten aurrean gaude berrehun metroko etxean / kontraesanak ezkutatuaz gure zimur bakoitzean». Iraultzarik ezean, aldaketa Ibarzabalen argudioa: «Ba hala ere nik erosten dut beti herriko dendetan / ta ez naiz joaten horren urruti pultserekin oporretan / ulertu dugu iraultza haundirik ez datorrela benetan / baina aldaketak hortxe daudela erabaki txikietan».

Kartzelako gaiak, berriz, helduleku asko eman zien bertsolariei. «Usaina hartu duzu, eta urduri jarri zara» zioen, eta Jon Martinek, adibidez, harreran hartutako umeari kantatu zion: «Usaina da usai idor doan uso izatera / ta ohitu beharko dugu esnera eta purera / hiru urteko haurtxo bat etorri baita gurera / berez pardelik ez dute baina motel dator bera / pardela aldatu diot bueno gutxi gora behera / ohartu naiz ipinia diot atzekoz aurrera / denontzat zaila da baina txikitxo ohituko gera / gu zure usainetara ta zu gure usainera».

Temas

Euskera

Contenido Patrocinado

Fotos

Vídeos