Milioi bat euroko laguntza liburutegietako funtsak berritzeko

Azken urteetan irakurtzeko ohitura duten pertsonen portzentaiak gora egin du. Espainiako Editoreen Gremioen Federazioaren datuen arabera, 2024an Espainian biztanleriaren % 70,3k bere burua irakurle deklaratzen du. Aisialdia da oraindik irakurtzeko arrazoi nagusia ( % 65,5), baina lan edo ikasketa bidezko irakurketak ere gora egiten du. Liburutegiek gune garrantzitsuak izaten jarraitzen dute, eta biztanleriaren % 28.8 joan zen liburutegi batera 2024an, batez ere liburutegi publiko batera.

Irakurleei eskaintzen dien zerbitzuaren maila mantentze aldera, Eusko Jaurlaritzako Kultura eta Hizkuntza Politika Sailak milioi bat euroko deialdia egin du Euskadiko liburutegietarako funtsak sortu edo berritzeko diru laguntzetarako.

Zehazkiago, Jaurlaritzatik jakinarazi duenez, 15.000 euro izango dira gehienez liburutegi sortu berriek funts sortak eskuratzeko; beste 30.000 euro Euskadiko Irakurketa Publikoko Sarekoak ez diren euskal liburutegietako funtsak hornitzeko dira; eta azkenik, diru laguntza nagusiena, 955.000 euro, lehendik Irakurketa Publikoko Sarean dauden liburutegiek liburu funtsak berritzeko izango da.

Euskal Autonomia Erkidegoko (EAE) liburutegi publikoen titular diren udalei, toki erakunde eskudunei eta EAEko udal liburutegi publikoen arloan eginkizunak esleituta dituzten eta Euskadiko Irakurketa Publikoko Sarekoak diren udal erakundeei zuzendutako deialdia da.

Irakurketa Publikoko Sarekoak izanik tokiko erakundeek kudeatzen ez dituzten EAEko beste liburutegi batzuk eta, sareko kide ez izanik, Euskadiko Liburutegi Sistemako liburutegien titularrak diren pertsona juridiko pribatuak ere dira onuradunak.

Eskaerak aurkezteko epea hilabetekoa izango da agindua Euskal Herriko Agintaritzaren Aldizkarian argitaratu (abuztuak 28) eta biharamunetik hasita.

Iazko deialdian Euskadiko 186 liburutegik jaso zuten beren funtsak berritzeko edo sortzeko diru laguntza.