Euskarazko antzerkia, Esloveniara bidean

Arriaga Antzokiak ekoitzitako 'Moto-Membra Jesu Nostri' obra Liublianara (Eslovenia) joango da DoSEL – Drama of Smaller European Languages europar proiektuaren baitan, hizkuntza gutxituetan lan egiten duten antzokien arteko trukea sustatzen duen egitasmoa. Emanaldia urriaren 2an izango da Cankarjev Dom Cultural Centren, Etxepare Euskal Institutuaren laguntzarekin.

Ekoizpenak Dietrich Buxtehude Barrokoko musika kultuko konpositore eta organista germaniar-daniarraren musika eta Eneko Sagardoy aktorearen testua uztartzen ditu.

Lucia Astigarragak, ikuskizunaren eszena-zuzendariak, soiltasunez eta dotoreziaz ebazten du musikaren boterea nabarmentzeko eta, aldi berean, testuaren interpretazioari pisua emateko erronka. Sagardoyk berak antzezten du kontzertu antzeztu honetan, berak idatzitako testu bat interpretatuz, heriotza bezain unibertsala eta aldi berean pribatua den zerbaiti buruz hausnartzen duena. Musika Conductus Ensemblek interpretatzen du, Andoni Sierraren musika zuzendaritzapean.

Antzezlana Dieterich Buxtehuderen 1680ko 'Membra Jesu Nostri' kontzertuaren antzezpena da, Kristoren oinei, belaunei, eskuei, saihetsari, bularrari, bihotzari eta buruari eskainitako zazpi kantata.

Ahotsen artean bost bakarlari nabarmentzen dira: Jone Martínez, Lucía Gómez, Leandro Marziotte, Aitor Garitano eta Jesús García Aréjula.

Europar Batasunak kofinantzatutako DoSEL proiektuaren helburua da Europako kultura- eta hizkuntza-aniztasuna sustatzea, hainbat herrialdetako erakunde eszenikoen arteko lankidetzaren bidez. Proiektuan Eslovenia, Malta, Kroazia, Estonia, Kosovo, Bulgaria, Katalunia eta Euskal Herriko zortzi antzerki erakundek hartzen dute parte.

Testuinguru honetan, 'Moto-Membra Jesu Nostri' jatorrizko bertsioan aurkeztuko da, euskaraz,— eslovenierara azpititulatuta —, Europako zirkuitu eszenikoan euskararen presentzia indartuz. Ikuskizunak Andoni Sierraren zuzendaritza musikala eta Lucia Astigarragaren eszenaratzea ditu.

Parte-hartze horrek berretsi egiten du Etxepare Euskal Institutuak euskarazko sorkuntza garaikidearen nazioarteko proiekzioarekin duen konpromisoa, eta balioan jartzen du antzerkia hizkuntza gutxituei ikusgaitasuna emateko tresna bezala.

Temas

• Etxepare Euskal Institutua