'Amorantiak' laukoteak irabazi du 'Bota bertso bat' lehiaketa

Zumaiako Bertso Eskolak urtero garai honetan antolatzen duen 'Bota bertso bat' lehiaketak badu dagoeneko irabazlea. Epaimahaikideen ustetan, 'Amorantiak' izenarekin aurkeztutako laukotearena da herriko zenbait txokotan jarri diren kaxetan jasotako bertsorik onena. Lehiaketaren gaia 'Maite zaitut' zen eta irabazleek bi lagunen-tzako afaria eskuratu dute Talaipe jatetxean. 40 bat lagunek hartu dute parte aurtengo honetan.

Iosu, Nagore, Zorione eta Naiarak osatzen dute laukotea eta saritutako bertsoa honakoa da (doinua 'Habanera' da):

maite dut zu usaitzea

ezin saihestu dezaket

lehen aldia oroitzea

ordutikan lortu duzu

beti ni kitzikatzea

ez zintuzket aldatuko

behar zaitut dastatzea

Maiz mingotsa zeran arren

erraz da zu gozatzea

zuganako maitasuna

ez dut nahi inoiz galtzea

Beste askoren eskutan

ikusi arren maitea

zu besteik etzaitut behar

bazkalosteko kafea.

Epaimahaikideen ustetan, aurten beste bi bertso aipagarri ere izan dira, Iñaki eta Arritorenak, hain zuzen ere.

Sarean koplatan

Aurten lehen aldiz 'Txiotu kopla bat', Manu Garate saria lehiaketa jarri du abian Zumaiako Bertso Eskolak. Hemen ere 'maite zaitut' zen gaia eta saria, bertsoen atalean bezala, bi lagunentzako afaria Talaipen.

Lehiaketa berri honetan 28 kopla jaso ziren eta epaimahaiaren ustetan Lizarrako Pello Etxanizena izan zen kopla onena. Honako hau:

maite dut Zumaia

oraindik maiteago

Talaipeko mahaia.

Koplen atalean, bi lan izan dira epaimahaikideentzako aipagarriak, Aimar Goenaga (Eibar) eta Luix Unanue zumaiarrarenak.

Sariak atzo banatu ziren, bertsolari gazteekin Alondegian egin zen bertso saioan.

Saritutako lanekin eta lehiaketan parte hartutako gehienekin liburuxka bat osatu du Bertso Eskolak. Argitalpen hau kaxak egon diren tokietan (taberna batzuk eta Alondegia) eskuratu ahal izango da. Horrez gain, PDF formatuan baleike.com-en egongo da eskura hemendik gutxira.