Postal Kolekzionistak, bigarren tren bat eta 'bagoi hutsak'

Iñigo Asensiok, Ander Zubillagak, Juanjo Falconek, Michel Longaronek eta Irene Lopezek osatzen duten taldea egun «sendoago» dagoela aitortzen du Asensiok, kantuen egileak. «Hasieran ideia ez zen zuzenean aritzea, baina pixkanaka aurrera egiten hasi ginen, kantu batzuk genituen esku artean, lehenengo kontzertuetan erakusten hasi ginenak, eta elkarrekin moldatu ditugu. Lokaleko pisua gehiago nabarmentzen da, taldea osatuagoa dago orain hiru urteren ondoan, eta talde izaera nabarmenduko nuke disko berritik, nahiz eta lehenengoan ere zantzuak zeuden. Ez gara besterik gabe gelditzeko dinamika mantentzen duen taldea, diskoaren grabazioak edota kontzertuek bultzatzen gaituzte gehiago, baina sendoago gaude. Uste dut, pixkanaka, osagai guztiak bere tokian jartzen asmatzen ari garela, eta badoala zentzu konkretu baten bidean».

Trenak, bagoi hutsak, bidaiak edota 'ez lekuak' dira, hain zuzen, haien soinuaren bila ekindako bidean egindako bigarren geltokiko protagonistak. Tolosarraren ustez, baina, leku eta 'ez lekuen' arteko muga ez da erraza. «Askotan, ez lekuak definitzen saiatzen gara, baina norberaren araberakoak dira eta horrekin jokatzen du izen hori daraman kantuak. Uste dut lekuetan sentitzen naizela erosoago, baina, zenbaitetan, ez lekuak leku ere sentitu izan ditut, aireportu eta hegazkinetan lasaitasuna sentitzen dut, eta hortik abiatzen dira kantu asko».

Zortzi abestiz osatutako diskoak «soinu gordinagoa» du orain, pop biribilagoaren bila, zenbaitetan. Hainbat kantu itxialdia baino lehenago konposatu zituen Asensiok, eta beste hainbat, berriz, udazkenean eta neguan sortu zituen. «Etxean edo bidaietan osatzen ditut kantuak, hitzak, eta, ondoren, forma taldean ematen saiatzen gara. 'Ondo nago' eta 'Azken bagoitik' Japonian, 2019an, bueltako bidaian, ia-ia aireportu eta hegazkin artean osatu nituen. Azken konposaketa, berriz, 'Portuan' izan zen, otsailean, Suitzatik bertatik bidali nuen masterra, nahiko estu, baina iritsi zen».

Diskoa Ander Zubillaga taldekidearen estudioan grabatu dute Tolosan, eta Beñat Igerabide arduratu da nahasketaz eta masterizazioaz. Kolaborazio berrien artean, Mikel Urdangarin (ahotsa), Ruben Salvador (tronpeta), Aitor Zorzano (haize moldaketak) eta Xabier Zeberio (hari-moldaketak, biolina eta biola) topatu daitezke, besteak beste.