Espaloiak konpontzeko lanak egiten ari dira Arretxe eta Mujika parean

Pasa den astean hasi ziren Idiazabalgo Kale Nagusian espaloiak konpontzeko obrak. Lan hauek, Mujika jatetxearen aurreko bi espaloietan, eta Arretxe elkartearen eta anbulategiaren aurreko espaloian egingo dira. Bi eremu hauetan, zuhaitzen zuztarrek aspalditik lurreko baldosak altxatu dituzte, eta hau dela estropozuak, erorketak eta istripuak egon dira.

Anbulategiko espaloian ere, zuhaitzek baldosak altxatzeaz gain, zoruko materiala gastatzearen ondorioz, zuloz beteta zegoen eta bizilagunei, anbulategiko erabiltzaileei eta Pilarreneara zihoazenei, arriskua eta eragozpen handia sortzen zien. Konponketak egin eta baldosak aldatzeaz gain, arbolak ere bota dira Arretxe parean.

Zuhaitzak, egokiago diren batzuekin ordezteko asmoa du udalak.

Berritze lan hauek, Dida-11 S.L. eraikuntza enpresak egingo ditu, eta 20.088,91 euroko aurrekontua dute.