Usurbil

Udal brigadako operarioen lan poltsa berria osatzeko deialdia zabalik da

Usurbilgo Udalak brigadako operarioen lan poltsa berria osatzeko deialdia egin du: iragarkia GAOn argitaratuta, abuztuaren 1era izango da eskabideak aurkezteko epea. Oposaketa irekiaren bidez, hutsuneak bitarteko funtzionarioz hornitzea da deialdiaren helburua. Bertan parte hartu ahal izateko eskabideak eta oinarriak udalaren webgunean bertan deskarga daitezke.

Eskabideak aurkezteko epea amaitutakoan, onartuen eta baztertuen behin-behineko zerrendak onartuko ditu udalak, eta hiru egun balioduneko epea izango da erreklamazioak aurkezteko. Behin-behineko zerrendarekin batera, azterketa egiteko eguna, ordua eta tokia jakinaraziko dituzte. Azterketen fasea bakarra izango da, praktikoa, nahitaezkoa eta baztertzailea: gainditu dutenen zerrenda iragarki-taulan eta udalaren webgunean argitaratuko dira.

Lan poltsak bi zati izango ditu: A eta B atalak. A atalean hizkuntza eskakizuna akreditatu dutenak egongo dira, oposaketako frogan lortutako puntuazioaren araberako hurrenkerarekin; B atalean, hizkuntza eskakizuna akreditatu ez dutenak egongo dira, horiek ere lortutako puntuazioaren araberako hurrenkerarekin. Beti, lehenik, A poltsa erabiliko da, eta hori agortuta izangairik ez balego joko litzateke B poltsara.