Iztuetaren jaiotzaren 250. urteurrena ospatzeko hainbat ekintza prest dira

Juan Ignazio Iztueta./
Juan Ignazio Iztueta.

IRAOLA ZALDIBIA.

Hilaren 29an beteko dira 250 urte Juan Ignazio Iztueta Etxeberria jaio zela. Hori dela eta ekintza asko eta handiak izango dira, egun horretara bitarte, aurrekoan, alkateak eta Iztueta Elkarteko arduradunek eman zuten prentsaurrekoan azaldu zutenez.

Juan Ignazio Iztuetak bizitza oso mugitua izan zuen, bai burutu zituen lanengatik eta baita justiziaren aurrean behin baino gehiagotan agertu behar izan zuelako. Baina, batez ere, dantzari, dantza-maisu, idazle eta bertso-jartzailea izan zen. Hain zuzen, herritar batek komentatu digunez, «aukera bikaina zen urteurren honetan bere bertsoekin liburu eder bat publikatzeko, bertsoak, dagozkien komentarioekin, antolatuta baitaude. Beste batean beharko du», esan digu etsipenez bertsoen antolatzaile horrek.

Bertsolaria ote zen jakin aurretik, bi aipamentxo egingo ditugu. Hau dio Orixek: «Poeta gaia zen inolaz ere Iztueta, bere burua lantzeko bidea izan balu». Eta beste hau Manuel Lekuonak idatzia da: «Olerkari bezela, Iztueta etzan izan beste munduko gauza. Bañan, ori bai, gai ortan ere asko ageri izaten zitzaion bere beste alderdia, bertsolari-alderdia. Nolanai dala, itz-neurtua oso ondo ta «aire ta bote» esan oi dan bezela, erabiltzen zuan».

Kontuak kontu, egin direnez gain honako ekitaldi hauek daude hemendik hilaren 29ra: hilaren 23an, osteguna, 'Iztuetaren garaia eta lanak', 18:30ean Karreranea Kultur Etxean. Hizlaria: Gerardo Elortza. Hilaren 26an, igandea, Iztuetak jasotako dantzen erakustaldia, 12:00etan plazan. Parte hartzaileak: Donostiako Udaleko txistulari taldea, Zaldibiako txistulariak eta Gipuzkoako hainbat dantza taldeetako kideak. Hilaren 29an, asteazkena, Iztuetari omenaldiak. Dantza Saio bereziak Gipuzkoako hainbat herritan. Zaldibian Iztueta dantza taldearen erakustaldia, 18:30ean, Txamarretxe plazan. Dantzari, dantza talde eta dantza zale guztiek, Iztuetaren jaiotegunean, hura omentzeko aukera izango dute.

Erakusketa, hilaren 29ra arte, egongo da Karreane Kultur Etxean 'Juan Ignazio Iztueta': astelehenetik ostiralera 17:00etatik19:30era.

Contenido Patrocinado

Fotos

Vídeos