Bertsolaritzaren inguruko zenbait ikerketaren aurkezpena

2016ko uztaileko argazkia, Beñat Krolem 'oholtza'-rekin espazio berriak sortzen Europa bat-batean ekimeneko azken jaialdian./USOZ
2016ko uztaileko argazkia, Beñat Krolem 'oholtza'-rekin espazio berriak sortzen Europa bat-batean ekimeneko azken jaialdian. / USOZ

Esku artean dituzten lanak aurkeztuko dituzte asteazken honetan Subijana etxean Ane Labakak, Itziar Navarrok, Beñat Krolemek eta Jon Martinek

Ane Labakak eta Itziar Navarrok Mintzolak eta UPV/EHUren Laboa katedrak esleitutako ikerketa proiektu sari bana eskuratu zuten iaz. Beñat Krolem eta Jon Martin, berriz, doktore tesiarekin ari dira. Lau ikerlariok bertsolaritzaren inguruan martxan dituzten ikerketetak aurkeztuko dituzte jendaurrean asteazken honetan, urriaren 18an, Mintzola Ahozko Lantegiak eta UPV/EHUko Mikel Laboa Katedrak antolatutako hitzorduari esker. Ekitaldia 18:30ean hasiko da, Mintzolaren egoitza den Amasa-Villabonako Subijana etxean. Sarrera doakoa izango da eta interesa duen bertsozale, ikertzaile zein herritarrentzat zabalik dira Mintzolako ateak.

Zer entzungo dute bertan? Bada, aurrena, aurkezpenak, eta ondotik, horietako batean oinarritutako bertso emanaldi berezia. Aurkeztuko diren ikerlanei dagokienez, ikerketa proiektu sariari esker 'Bertsolaritzan garatutako umorea(k), genero ikuspegitik' lana garatu du Ane Labakak, eta Itziar Navarrok, berriz, 'Bertsolarien kantaeraren bilakaera denboran zehar. Oiartzungo kasua' gaiari heldu dio.

Bestalde, Beñat Krolemek eta Jon Martinek doktore tesi bana dute esku artean: 'Oholtza. Ahozko inprobisazioan zeharkako ibilbidea: irudia eta hitza' eta 'Xabier Leteren bertso, olerki eta kanten analisia' ari dira lantzen, hurrenez hurren.

Emanaldian Krolemek, Martinek eta Labakak hartuko dute parte: Beñat Krolemek bere ikerketaren parte den 'Oholtza' performancea gauzatuko du, Jon Martin eta Ane Labaka bertsotan direla.

Gogoratu behar danbertsolaritza jakintza alor jakin batetik aztertu nahi duten ikertzaileentzat aurten ere badela ikerketa proiektu saria eskuratzeko aukerarik, Mintzola Ahozko Lantegiak eta UPV/EHUko Mikel Laboa Katedrak bi ikerketa proiektu sari dituzte aurten banatzeko. Deialdia uztailean zabaldu zen eta igande honetan amaitu da ikergaiak aurkezteko epea.

Temas

Euskera

Fotos

Vídeos