«Txikitatik gustatu izan zait zintzilik ibiltzea»

Haur ia guztiei bezala, Maddi Agirreri zuhaitzetara igotzea eta zintzilika ibiltzea gustatzen zitzaion. Hala, pasio horri erantzunez txikia zela erabaki zuen eskaladan izena ematea eta, orain, hamazazpi urterekin, Euskadiko txalpelduna da soka modalitatean. Ordiziaren izena munduan zehar darama, nahiz eta penaz dioen herrian ez dela orain rokodromorik geratzen, eta horrek oztopatu egiten du jende gehiagok kirol hau ezagutzea.

Maiatzean Europako txapelketan lehiatzen aritu da, «oso gustura», eta, asteburu honetan, Espainiako Zailtasun txapelketan ariko da Kataluniako Sant Martí de Tous herrian.

Eskaladarako afizioa barrutik datorkion zerbait da, familian ez baitzuen aurrekaririk. Sei urte zituen etxean eskalatzen ikasi nahi zuela esan zuenean. Gurasoak hasieran harritu egin baziren ere, Tolosako kiroldegiko ikastaroetan apuntatu zuten. Eskalada munduan lehenengo pausuok eta lehiaketak ia batera iritsi zitzaizkion. «Betidanik parte hartu dut hemen inguruan antolatzen diren open eta lehiaketa herrikoietan», azaltzen du. Oraindik gogoan du Emaneurre taldeak antolatu zuen Goierriko 7 Orduak jardunaldian nola parte hartu zuen, duela hamar urte inguru. Lazkaokoak Tolosakoen aurka aritu ziren eta bera Tolosako taldeko kide izan zen.

Gainera, Euskal Selekzioak deitu zionetik, txapelketa ofizialetara salto egin zuen. Emaitzak iristen hasi ziren modalitate ezberdinetan. 13 urterekin infantil mailako Espainiako txapelketa irabazi zuen, Over All modalitatean, abiadura, bloke eta zailtasuna (soka) ariketak konbinatzen dituena. Hurrengo urtean ere garaipena errepikatu zuen.

Josune Bereziartu eskalatzaile ohia ez zuen aktiboan ezagutu Maddik, baina erreferente izaten jarraitzen duela onartzen du, Ainitze Belar eta Haizea Oses euskaldunekin batera.

Gaur egun Concious Training Climbing Teamen entrenatzen du ordiziarrak Esther Cruzekin. «Gogor entrenatzeak emaitzak ematen ditu», zioen azaroan Espainiako kopan hirugarren postua lortu ondoren bloke modalitatean. Gainera iaz, bigarren izan zen Espainiako bloke txapelketan eta, kopari dagokionean, sokan txapelduna ere bada. Aurten dagoeneko txapelak jantzi ditu: otsailean Euskadiko txapelketa irabazi zuen sokan eta gutxienez iazko denboraldiko emaitzei eusetko esperantza du. «Ea errepikatu daitekeen...», dio zalantzati.

Bizilagunen animoak ez zaizkio falta. «Hau hurrengo Olinpiadetara joango da», agurtzen du elkarrizketa bitartean ordiziar batek. Etxekoentzat, berriz, garrantzi-tsuena «gozatzea da, handik aurrera ikusiko da», dio amak.

Bere adinarekin ohikoena modalitate bat edo beste aukeratu eta espezializatzen joatea da ohikoena, baina Maddi oraindik ez du pauso hori eman. «Ezin dut aukeratu», onartzen du. Udako atsedenaldiaren ondoren, irailean ekingo dio berriro, bloke edo sokan, baina podioa lortzeko itxaropenarekin lanean.

• Temas
• Historias visuales