Ataungo Udalak XI. Argazki Ralia antolatu du biharko

Ataungo Udalak XI. Argazki Ralia antolatu du igande honetarako. Lanbidez argazkilariak ez diren zaletuei zuzendua, egun berean, goizeko 9.00etatik 10.00etara egin beharko da izen-ematea Ataungo udaletxean bertan. Bost euro ordainduko da eta momentu horretan begiratuko dira memoria txartelak. Gaiak ere raliaren egunean jakinaraziko dira.

Parte-hartzaile bakoitzak gehienez 36 argazki jaitsi ahal izango ditu parte hartzeko. Aukeratutako argazkiak ezingo dira manipulatu eta erabiliko den formatua jpg izango da. Partaideek memoaria txartelak 13:30etatik 14:30etara entregatu beharko dituzte.

Sariak

Argazki Raliearen irabazleak 300 euro eta oroigarria eskuratuko ditu; bigarren sailkatuak, berriz, 150 euro eta oroigarria. Lehen eta bigarren herritarrentzat ere sariak izango dira: 90 euro eta oroigarria, eta 2 txuleta eta 2 botila ardo, hurrenez hurren. Saritu bakoitzak sari bakarra jaso ahal izango du.

Sari-banaketa eta aukeratutako argazkien proiekzioa azaroaren 21ean egingo da, eguerdiko 12:00etan, Ataungo Herri Antzokian.