Otsaila bitarte zinema aretoetan euskarazko eskaintza bermatzeko ekimena

Zinema aretoetan dagoen euskarazko eskaintza urriari erantzuteko asmoz UEMAk eta Tinkok Ataunen, Azpeitian, Etxarri-Aranatzen eta Igorren hiru hilabetez euskarazko filmak, dokumentalak eta saioak eskainiko dituzte astebururo otsaila bitarte Zinuema ekimenaren baitan.

Antolatzaileek zehaztu dutenez azken ikerketek argi erakutsi dute euskarazko kultur kontsumoa erdarazkoen oso azpitik dagoela, baita udalerri euskaldunetan ere eta, horregatik, 12 ikus-entzunezkoren egitaraua proposatu dute esperientzia pilotu modura. Besteak beste, Bertsolari Txapelketa Nagusiaren finala pantaila handian zuzenean ikusteko aukera izango da.

UEMAko lehendakari Iraitz Lazkanoren hitzetan, «euskarazko kultur eskaintza indartzeko nahia dago egitasmo honen oinarrian. Administrazioen ardura da euskarazko ikus-entzunezkoen ekoizpena sustatzea eta programazioetan lan horiek txertatzearen aldeko apustua egitea. Horregatik abiatu dugu ekimen hau; guri toki-administrazio gisa dagokiguna kontuan hartuta, gure esku dagoena egiteko; borondatea izanez gero bidea egin daitekeela erakusteko, baina baita gai honetan guk baino eskumen zabalagoa dutenei gure bidelagun izan daitezen eskatzeko ere».

Hauek dira otsailaren 19ra bitarte eskainiko diren filmak, dokumentalak eta ikus-entzunezkoak:

Tinko Filmeak-en helburu nagusia, hain zuzen, euskarazko zinema komertzialaren eskaintza gabeziari erantzutea da. Tinkoko Iñigo Arandiak azaldu du duela ia 30 urte hasi zirela lanketa hori egiten, eta egungo egoera ez dela askoz hobea. Arandiak Pantailak Euskaraz herri mugimenduak emandako datuak ekarri ditu gogora: «Gaur egun, bertako ekoizleek sortzen dituzten euskarazko filmak 2-3 izan daitezke urterik hoberenean, eta Eusko Jaurlaritzaren menpe dagoen Zineuskadi erakundeak 10-12 film bikoizten ditu urtean, haurrei zuzendutakoak denak edo ia denak».

Horretaz gain, proba ondo joanez gero eskaintza zabaltzeko asmoa dutela aurreratu dute.

Temas

• Zinema