Malkovichen hamaika aurpegi eta erretratu

Zinemaldiarekin bat egin du, aste honetan zehar, San Telmo Museoko 'Sandro Miller. Malkovich, Malkovich, Malkovich' erakusketak. Azaroaren 17ra arte, doako sarrerarekin ikusi daiteke aktorea Albert Einstein, Che Guevara, John Lennon eta Andy Warhol bihurtuta.

Guztira, erakusketak 61 argazki biltzen ditu, txuri-beltzean eta koloretan, eta horietan John Malkovich aktorea argazkilaritzaren historiako irudi ezagunetako pertsonetan eraldatzen da. Argazki horiek Sandro Millerrek hautatuak eta egindakoak dira.

2013an, bere karreran eragina izan duten argazkietako gizon eta emakumeak omenduko zituen proiektua hasi zuen Sandrok. Argazkilaritzako maisuei omenaldia ere bada proiektua, Millerrengan inpaktua izan duten argazkiei omenaldia egiten die.

Besteak beste, ikusi daitezke Irving Penn-ek Truman Capote-ri izkina batean egindako argazkia; Bert Stern-ek Marilyn Monroe-ri egindako argazkiak; ama emigratzailearen irudia, Dorothea Lange-rena; Robert Mapplethorpe-ren autoerretratua errifle batekin; John Lennon eta Yoko Ono-ren irudi ikonikoa, Annie Leibovitz-ena; Diane Arbus-en esku-granada bat duen mutil baten argazki klasikoa; Richard Avedon-en erlezaina.