Irudimena, galtzen ez den altxorra

Mikel Soroa Lehen Hezkuntzako arduradunak azaldu duen moduan, «bizitzako alderdi guztietan beharrezkoa dugun zerbait da sormena». Gaur egun, hain aldakorra den mundu honetan, gaitasun hori beharrezkoa dugu sortzen diren egoera berrietara egokitzeko eta arazoei aurre egiteko. Bestetik, gure barne mundua azaleratzeko eta nahi dugun hori espresatzeko ezinbestekoa da, eta «artearen bidez, literatura forman, gorputz espresio bidez, antzeztuz, musika bidez eta arte plastikoen bidez lantzen dugu».

Horretarako, Ikastolak baldintza egokiak eta momentuak eskaini behar dizkio ikasleari, egoki garatzeko aukera izan dezan. «Pertsona orok dugu sormenerako potentzial bat, baina haurrak gaitasun berezia du. Beraz, Ikastolan sormen horri ez dizkiogu mugak jartzen eta gaitasun hori garatzeko proposamenak egin eta testuingurua eraikitzen dugu».

Zurriolan, HHtik hasi eta Batxilergora bitartean lantzen dugu sormena, eta eskolaz kanpoko jardueretan ere leku berezia egiten diogu.

«Haurrak, txikiak direnean, zentzumenen bidez espresatzen dira, ez dakitelako hitzekin adierazten; beraz beste baliabide batzuk erabiltzen dituzte», adierazi digu Leire Agirre Haur Hezkuntzako etapaburuak. HHn, haurrak jolaserako dauzkan tarte ugarietan du sormena lantzeko aukera, erabilera bat baino gehiago duten jostailuekin, eta, hala, bere imaginazioa garatzen du, bestelako jostailu hertsiek ezartzen dituzten muga horiek sahiestuz. Horrez gain, naturarekin lotutako jarduerak egiten dira Baso Eskola proiektuaren barruan, eta aukera ematen diegu haurrei naturako hainbat materialekin jolasteko eta haiengandik ikasteko.

LHn, sormena lantzen jarraitzeko, 'Elkarrekin Sortuz' tailerrak sortu ziren, eta musika, plastika eta antzerkia lantzen ditugu horietan. Horrez gain, musika arloa ere lantzen dugu, eta ahozkotasuna, bertsolaritza eta kantuarekin lotutako bestelako jarduerak ere etengabe egiten ditugu.

Ikasturtean zehar, maiz, bestelako ekintzak ere egiten dira, besteak beste kantu emanaldiak, kalderero eta inauterietako dantzak edota Zurriolaokea. Azken hori, adibidez, gure Ikastolaren eguna ospatzeko sortu den ekintza bat da; tradizio eta pisu handia du, eta zenbait astetan dantza koreografiak sortzen dituzte ikasleek ospakizun egunean Ikastola guztiaren aurrean plazaratzeko.

DBHn, LHko etapa atzean utzi eta norabide akademikoa zirriborratzen hasiko da ikaslea, baina bide horretan ere badago sormenerako tartea. Musika eta plastika lantzen jarraitzen dugu, eta sormenerako aukera ematen duten hainbat ikasgai ere eskura ditugu, ikaskuntzaren adar desberdinetan gaiak lekua duela agerian utziz: robotika, matematika tailerra, literatura tailerra, teknologia, IKT, ikus-entzunezkoen arloa… Gainera, teorikoagoak diruditen ikasgaiek ere proiektu ugari lantzeko aukera ematen digute.

Batxilergoan ibilbide desberdinak aukeratu beharrean aurkitzen gara ikasleok, eta urte guzti horietan hain erroturik izan dugun sormena inoiz baino errealago bihurtzeko aukera eskaintzen digu Ikastolak: Batxilergo Artistikoa. Arte munduarekin loturiko ikasgaiak lantzeaz gain, bizitza profesionalean sormenak duen garrantziaz ohartzen gara, eta gaur egungo mundu digitalak eskaintzen dizkigun aukerak baliatzen ditugu horretarako. Ikastola barruan sorkuntzara dedikatutako espazioak erabili eta gizarteak eskaintzen dizkigun aukerak ere aprobetxatzen ditugu gure jardunerako: muralak egiteko, erakusketak antolatzeko, museoak bisitatzeko…

Ikastolan, sormena orduz barne lantzeaz gain, hainbat eskolaz kanpoko jarduera ere baditugu, zuzen-zuzenean lotuak hizpide dugun gaiarekin. Batetik, Zurriola Musika eta Dantza Eskola dugu ikasle, guraso, langile eta auzokideen eskura, musika-hezkuntzaz, hainbat musika-tresnaz eta dantza-diziplina ezberdinez gozatzeko aukera ematen diguna. Bestetik, Zurriola Antzerki Eskola ere badugu, LH 3tik hasi eta amateurren taldea osatzeraino. Azkenik, Zurriola Arte Eskola sortu genuen duela 4 urte, sormen-mota honi ere leku eginez.